Nō ka wai ʻino, ʻinoʻino ka ʻāina

na Laiana Wong (ka lā 23 o Kēkēmapa, 2017)

Synopsis: Many homes in Hawaiʻi are still utilizing cesspools to handle waste water. This is not a sustainable practice as it could ultimately seep into our sources of drinking water.

Aloha e nā hoa kanaka o ka noho pū ʻana ma ko kākou ʻāina aloha. He wahi kumuhana kaʻu e hāpai ai no kekahi hana i maʻa iā kākou a pau, ʻo ia ka noho ʻana i ka ipu lua e hoʻopau ai i ka pilikia, a pau ka hana, hoʻokuʻu aku nō i ka wai ʻino a nalo ka ʻino. I ka pule nei, ʻo au kekahi e noho ana i ka ipu lua e heluhelu ana hoʻi i ka nūhou kūloko ma luna o ke kelepona, a ʻike akula au i kahi moʻolelo e hoʻākāka ana i kahi e nalo ai ua wai ʻino lā. A he moʻolelo nō ia i noʻonoʻo ʻole ʻia e ka hapanui o kākou hoa kanaka. He moʻolelo hōlina naʻe ia e ao ai kākou o ʻinoʻino auaneʻi kēia ʻāina aloha.

Nui hewahewa nā luawai pelapela ma Hawaiʻi nei. Wahi a ka ʻOihana Mālama Olakino (ʻOMO), ma kahi o ke 88,000 ka nui, a ʻo ka hapanui hoʻi, aia nō ma nā wahi kuaʻāina, kahi nele i ka ʻōnaehana paipu lawe ʻino. A no ia mea, e nō wale aku nō ka wai ʻino i loko o ka ʻāina. A ʻoiai no ka ʻāina mai ke 90% o kā kākou wai inu, inā e mau aku nō ia nō ʻana, ʻino mai auaneʻi kā kākou wai inu. A no laila, aia ka pono i ke kanu ʻana i kahi pahu hoʻomaʻemaʻe wai ʻino. E aho ia i ka hoʻokuʻu wale ʻia o ia wai e nō aku ai i loko o ia ʻāina aloha o kākou.

Wahi a ka (ʻOMO), aia ʻehā kūlana o ia hana he mālama ʻino ma Hawaiʻi nei. ʻO ka mea mua, ʻo ia ka wehe ʻana i nā mea kino paʻa ma o ke kānana ʻia ʻana, ka hoʻokiʻo ʻia ʻana, a me ka hoʻohui ʻia ʻana o nā hunahuna ʻino a paʻa. ʻO ka lua o ke kūlana, ʻo ia ka wehe pau ʻana i nā mea ‘okanika ma o ka hoʻohana ‘ana i nā mea ola nāna ia e ʻai aku. ʻO ke kolu, ʻo ia ka wehe i nā mea ola a wehe pū me kekahi mau kemikala, ʻo ka naikokene, ka pokepola, a me nā ʻano mea ʻawahia like ʻole. ʻO ka hā, ʻo ia ka hoʻopōʻaiapuni ʻana i ka wai ʻino no ka hoʻoulu mea kanu, a i ʻole ka waiho ʻana a omoāea.

Hiki ke ʻike ʻia, ʻo ka helu ʻehā ke kūlana maikaʻi loa no ke ola o ka ʻāina a me ke kaiāulu, a i ke emi mai o ia helu, emi pū mai me ka maikaʻi o ke kaiāola. ʻO ka helu ʻekahi, ʻo ia ka lua hoʻokiʻo wai hoʻi, ʻo ia ke ʻano nui loa o ka nō ʻana o nā mea ʻino i loko o ka ʻāina me ka hoʻomaʻemaʻe ʻole ʻia. No laila, ua emi loa mai ka nui o nā lua hoʻokiʻo wai e ʻae ʻia nei e ka ʻOMO o Hawaiʻi nei, a ua pāpā loa ʻia ma nā ʻāīna e kūpilikiʻi nei. Eia naʻe, he nui nō nā lua e waiho nei mai ka wā mai i nui ai ko lākou ʻeli ‘ia. I kēia manawa naʻe, he mea nui ka hoʻololi ʻana i nā luawai pelapela a lilo mai i pahu hoʻomaʻemaʻe wai ʻino.

He wahi ʻike lihi koʻu i kēia hana, no ka mea, pēlā māua ʻo kaʻu wahine i hana ai ma ko māua hale. Ua kanu ʻia nō kekahi pahu ma ka ʻaoʻao o ka lua hoʻokiʻo wai ʻino, a no laila, e wehe pau ʻia nā mea ʻokanika mai loko mai o ka wai ʻino a ʻano maʻemaʻe maila. ʻO nā mea kino e koe ana, eia aku a eia mai e pauma ʻia nō. ʻO ka wai i hoʻomaʻemaʻe ʻia, e kahe aku nō ia i loko o ka lua wai kahi e kānana ʻia ai ma kona nō ʻana i loko o ka ʻāina. I ia manawa, ua ʻano maʻemaʻe mai ka wai, ʻaʻole naʻe au e inu!

Na ke kāleka ia e hōʻoia i ke kanaka?

na Laiana Wong (ka lā 16 o Kēkēmapa, 2017)

Synopsis: If you have to renew your state ID, be sure to take all the necessary documents – birth certificate, soial security card, and two documents verifying your resident address.

Aloha mai kākou e nā hoa heluhelu. ʻO Laiana nō paha kēia e hoʻolaha aku nei i kēia manaʻo, ʻaʻole paha. Pehea ana lā ʻoukou e ʻike ai? Ua hōʻike ʻia aʻela kona inoa ma hope o ka huaʻōlelo “na” ma luna aʻe nei, a kainō ʻo ia ʻiʻo nō ka mea nāna kēia ʻatikala i kākau. Eia naʻe, ʻaʻole ʻoukou i ʻike maka i ke kanaka nona kēia mau manaʻo, a nāna hoʻi ia e kākau nei. Na ka hilinaʻi wale nō i ka ʻoiaʻiʻo o ia inoa e alakaʻi i ka noʻonoʻo ʻana ʻo Laiana nō kā ia e kākau nei.

I kēia au a kākou e noho nei, he mea nui ka mālama ʻana i kekahi kāleka hōʻoia kanaka, i mea e hōʻoia ai i ua kanaka nei, ʻo ia nō ia. He au hou kēia. Aia nō i ka nuʻa nā kānaka. A no laila, ʻaʻole i kamaʻāina nā mea a pau o ke kaiāulu e like me ka wā ma mua. Ke hele au i Costco ma Iwilei, paʻapū mau ia wahi, a kākaʻikahi ʻiʻo hoʻi koʻu hālāwai ʻana me kekahi hoa kamaʻāina. Ua hele nō a malihini au i koʻu ʻāina hānau! A inā e manaʻo au e kūʻai i kekahi mea a uku hoʻi me kekahi pila kīkoʻo a kāleka kāki paha, ʻaʻole e nele koʻu koi ʻia e hōʻoiaʻiʻo ē ʻo au nō kā ia e uku nei. Aloha nō ia mau lā i hala akula. He kamaʻāina nō ke kamaʻāina!

Aia ma ka ʻaoʻao ʻEwa o Costco, ma ke alanui ʻo Alakawa, ke keʻena aupuni kahi e kiʻi ai i ke kāleka hōʻoia kanaka. Ma laila māua ʻo koʻu kaikaina i hele ai i kēlā pule aku nei no ka hoʻōla hou ʻana i ko ia ala kāleka, a he mau lā wale nō ia ma mua o ka palena. Aloha nō kahi keiki ʻo au. Ua ʻike ʻole i nā lula. I ko māua hele mua ʻana, ʻaʻole nā palapala a pau e pono ai. Auē! ʻO ka hoʻi nele ia i ka hale. Hoʻokahi wale nō pōmaikaʻi o ia hoʻohoka ʻana. Ua pale ʻia ko māua komo loa ʻana ma loko o ia keʻena a me ke kū ʻana hoʻi i ka laina loloa no 2 a 3 paha hola, a oki loa ka hoka.

ʻImi akula māua i nā palapala a pau i koi ʻia, ʻo ka palapala hānau, ka palapala helu ola, a me ʻelua palapala e hōʻike ana i ko ia ala helu wahi. A paʻa ia mau mea, hele hou akula māua i ke keʻena i ka P2 nei. Ma hope o ke kū ʻana ma ka laina loloa, ua hiki aku māua i ka pukaaniani, kahi e kamaʻilio ai me ka limahana. I nānā mai ka hana o ua limahana nei i nā palapala a pau, ʻōlelo maila ʻo ia he hoʻokahi wale nō palapala e hōʻike ana i ka helu wahi o ka hale a koʻu kaikaina e noho ana, a nui nā palapala e hōʻike ana i koʻu helu wahi. No laila, ʻaʻole e hōʻike ʻia ko ia ala helu wahi ma luna o ke kāleka.

Noi akula au e nānā hou ʻo ia i nā leka i hoʻouna ʻia mai iā ia ma o koʻu helu wahi. ʻO kona hoʻi akula nō ia i kahi lumi ma hope o kona pukaaniani, kahi e kamaʻilio ai me kona luna. ʻAʻole nō a he wā, hoʻi maila ʻo ia me ka hōʻike ʻana mai ua hiki ke hoʻohana ʻia ke kāleka hōʻoia kanaka kahiko i mea e hōʻoia ai i ka helu wahi o koʻu kaikaina, ʻoiai ʻaʻole i pau ka pono o ia kaleka. He akamai hoʻi kau! ʻO ke kāleka hōʻoia kanaka kahiko i hoʻohana ʻia no 6 makahiki no ka hōʻoia ʻana i koʻu kaikaina, nāna nō i hōʻoia mai i koʻu kaikaina, ʻo ia nō koʻu kaikaina!

Nalo ka wahine i loko o ka huaʻōlelo aikāne

na Laiana Wong (ka lā 9 o Kēkēmapa, 2017)

Synopsis: There is an implication attached to the word aikāne, that it only applies to males. Females are not represented based on its overt construction. Its meaning, generally understood through English translations, can carry negative connotations.

Aloha kākou e nā aikāne (hoa) ʻōlelo Hawaiʻi. I ka P3 nei, ua mālama ʻia ke kūpale papahana laeoʻo a kaʻu haumāna, ʻo Kuʻulei Alves, no ke kekelē ʻōlelo Hawaiʻi. ʻO ke kumuhana i noiʻi ʻia, ʻo ia ke kūlana o ka wahine ma ke kuanaʻike Hawaiʻi. Hoʻohālike ʻia aku nō ia me ke kūlana o ka wahine ma ke kuanaʻike haole. A i loko o kā ia ala hōʻike, hāpai ʻia maila kahi huaʻōlelo e lohe nui ʻia nei ma ka ʻōlelo Hawaiʻi, ʻo ia nō ʻo “aikāne”, a kūkākūkā ʻia hoʻi kona mau manaʻo like ʻole.

Hōʻike maila ʻo ia ala i nā manaʻo i hōʻiliʻili ʻia e Pukui mā lāua ʻo Elbert, a pēlā hoʻi me kā Andrews a me kā Parker. Ua hoihoi nō ka hoʻohālikelike ʻia ʻana o kēia mau wehewehena kekahi i kekahi, no ka mea, ʻaʻole i like a like ka ikaika kuhi o ia mau puke i ke ʻano o ka moe ʻana o nā kānaka. Ua kuhi pololei aku ʻo Andrews i ka pilina o kēia huaʻōlelo Hawaiʻi me ka huaʻōlelo “sodomy” ma ka ʻōlelo haole. Ma loko o ka puke a Pukui mā, aia wale nō ke komo ʻana o ia manaʻo a pākuʻi ʻia mai ka huaʻōlelo “aikāne” ma ke ʻano i kāhulu no “moe”, ʻo ia hoʻi, ʻo “moe aikāne”.

I hoihoi kēia, no ka mea, e like me ka hōʻike a Andrews, ua wehewehe ʻo Pukui mā ma o ka ʻōlelo haole penei, “An intimate friend of the same sex”. Eia hou, he ʻelua huaʻōlelo ma ke kūkulu ʻia ʻana o ka huaʻōlelo “aikāne”, ʻo “ai” a ʻo “kāne”, a ʻo ka manaʻo mua o ai ma lalo o ka wehewehe ʻana a Pukui mā, ʻo ia ke “coition”, he ʻano huaʻōlelo kūlana kiʻekiʻe no panipani. A ua lilo ka huaʻōlelo “kāne” ʻo ia kona kāhulu. Aia i laila ka mea hoihoi. Kohu mea lā, he hana ia na ke kāne wale nō e lawelawe ai, a na haʻi paha e lawelawe mai ai i ke kāne. ʻAʻole paha pēlā.

Pehea lā hoʻi ka wahine? Ma muli nō paha o ia hua ʻo “kāne”, e manaʻo ʻia iho ʻaʻohe komo ka wahine.  ʻAʻole i maopopo iaʻu nā hana a pau i hiki ke kapa ʻia he “ai”, a pēia hoʻi paha me nā manaʻo pili i ka huaʻōlelo ʻo “panipani”. ʻAʻole naʻe paha kēia he hana na ke kāne wale nō. He hana anei kēia na ka wahine? A he aha hoʻi ka manaʻo o “intimate”? Ua pili kēia hua i ia mau hana ʻo ke ai a me ka panipani? Noʻu iho, ʻaʻole paʻa ka haʻina iaʻu. Maliʻa o ala mai ka poʻe ʻike, a e kūkala mai lākou ma o kahi ua lā a kū ai i nā kala hale.

Wahi a Andrews, ʻo ka noho kekahi ʻano o ia mea he aikāne. ʻO ka noho pū ʻana ia he kāne a he kāne, a i ʻole ia, he wahine a he wahine. ʻO ka huaʻōlelo haole no kēia “noho pū” ʻana, ʻo ia hoʻi ʻo “cohabit”. Pehea lā? He ai nō paha ia, ʻaʻole paha? No ke aha i wehewehe lihi wale ʻia ai kēia hua i loko o nā puke wehewehe ʻōlelo? No ka makaʻu paha i ka hoʻohalahala ʻia mai? He mea ia e hilahila ai? Noʻu iho, he hana ia i hoʻokae ʻia e ka poʻe Kalikiano a ua hele a like ka manaʻo me ko ka huaʻōlelo ʻo “hoapili”. He hoapili a i ʻole he hoa ai, ʻaʻole e hihi. ʻAʻohe hewa i laila. He mau wāhine paha a he mau kāne, ʻaʻohe wehena i laila!

E mau ka pono o ka Lā Kūʻokoʻa

na Laiana Wong (ka lā 2 o Kēkēmapa, 2017)

Synopsis: Sir George Simpson of the Hudson Bay Company is one of the lesser known plenipotentiary envoys sent by Kauikeaouli to America and Europe to secure a treaty recognizing Hawaiʻi as an independent state.

Welina e nā hoa aloha ʻāina e paio nei no ke ea o ke Aupuni Mōʻī o Hawaiʻi he aupuni kūʻokoʻa. ‘O ka lā 28 o Nowemapa, i ka pule nei, ʻo ia ka piha ʻana o nā makahiki he 174 o ka lā i laha ai ke kuahaua a ka Mōʻīwahine o Pelekane a me ka Mōʻī o Palani no ko lāua ʻike ʻana a kākoʻo ʻana hoʻi i ke kūlana kūʻokoʻa o ke aupuni o Hawaiʻi nei. ʻAʻole kākou he ʻai pala maunu na haʻi!

I ka lā 24 o Nowemapa o ka MH 2002 (ʻo ka makahiki mua loa ia o ka puka ʻana o Kauakūkalahale), ua kākau maila koʻu hoa ʻōlelo Hawaiʻi ʻo Noenoe Silva, i kekahi kolamu no kēia lā nui e hoʻolauleʻa hou ʻia nei ma hope o nā makahiki he 100 a ʻoi o kona nalo ʻana. Ua kāpae ʻia e ka “Lepupalika” o Hawaiʻi, he pūʻulu ʻānunu a pākaha hoʻi ke ʻano, nāna i kāʻili hewa i ka mana o ka Mōʻīwahine Liliʻuokalani ma ka hoʻokahuli ʻana i ke aupuni o Hawaiʻi he mau makahiki ma mua iho, i ka MH 1893. Ua hōʻike ua ʻo Noenoe no ke kiʻi ʻana o Timoteo Haʻalilio lāua ʻo Uiliama Likeke e hoʻoponopono i ka hihia i kupu mai i ka MH 1843 ma muli o ka naʻi kolohe ʻana o ka ʻAkimalala Paulet i ke aupuni Mōʻī. Hiki ke heluhelu hou ‘ia kā ia ala moʻolelo ma Kauakukalahale.org. E hoʻouka wale mai nō i ka polokalamu Bloglovin ma ke kelepona paʻalima.

ʻO kekahi mea kōkua iā Haʻalilio mā, a i hōʻike ʻole ʻia kona inoa ma loko o ka moʻolelo a Noenoe, ʻo ia nō ʻo Sir George Simpson, he kiaʻāina no ʻEnelani e hana ana no ka Hudson Bay Company ma kahi o Wanekouwa. I ka MH 1842, i ko ia ala hōʻea ʻana mai i Hawaiʻi nei no kāna hana, ua ʻike ʻo ia i ka hihia i kupu maila a ua manaʻo ʻo ia, he kohu ʻole ka hana a Paulet. Ua hāʻawi mai ʻo ia ala i ke kālā he 10,000 paona me ke aʻoaʻo mai i ka Mōʻī Kamehameha III e hoʻouna aku i mau ʻelele no ka hele ʻana i ʻAmelika a me ʻEulopa e hoʻopaʻa ai i kekahi ʻaelike kuʻikahi me nā aupuni mana o ke ao. A laila, ua hoʻokohu ʻia ʻo Haʻalilio, Likeke, a me Simpson e lilo i mau ʻelele nona ka mana hoʻoholo a pūlima hoʻi ma ka ʻaoʻao o ke aupuni Mōʻī.

I ka P3 nei, ua mālama ʻia he haʻiʻōlelo na Keanu Sai ma ke Kulanui e pili ana i ka Lā Kūʻokoʻa. ʻAkahi nō au a lohe i ka inoa o Simpson. I hewa nō paha i koʻu noho naʻaupō e pili ana no ia moʻolelo? Eia au ke kuhi nei ua nalo kona inoa no kona hele ʻana ma o ʻālaka a me Lukia a hiki aku i ʻEulopa. ʻO Haʻalilio mā naʻe, ua hele ma o Mekiko, ma luna o ke kekake hoʻi, wahi a ka lohe, a ua hālāwai hou aku me Simpson ma ʻEulopa. Ma Ladana, ua hele lākou i mua o ke Kauna o Aberdeen. ʻAʻohe wahi kōkua i laila, no ka mea, ua kuhihewa ʻia he pilina kākoʻo ko Hawaiʻi me ʻAmelika.

Ma ia hope aku naʻe, ua hele lākou i Brussels, ma Belegiuma. Ma laila lākou i hālāwai ai me ka Mōʻī, ʻo Leopold I, a he pilina maikaʻi kona me nā ʻohana aliʻi o Palani a me ʻEnelani. A ma muli o ia pilina, loli ai ka manaʻo o ke kauna a ua pūlima ʻia ka ʻaelike e Pelekane a me Palani. Ma Iune o kekahi makahiki aʻe, ua hōʻike maila ʻo ʻAmelika i kona kākoʻo i ia kūlana o Hawaiʻi, he aupuni kūʻokoʻa. Mahalo ka hana nui a Sir George Simpson.

E ʻaʻala anei ka pua i kona inoa

na Laiana Wong (ka lā 25 o Nowemapa, 2017)

Synopsis: Names that have been suggested for the rail stations by a HART committee do not have meanings that reflect the history and the issues surrounding the project. They should have names that are informative.

Aloha mai kākou. ʻO kēlā poʻo manaʻo e kau mai ana ma luna nei, he nīnau ia no ka mana o ka inoa. I ka wā iā Uiliama Hoʻonāueueihe i kākau ai i kāna moʻolelo kaulana no nā ipo ʻelua, ʻo Romeo lāua me Julieta, no ke kaua hoʻomauhala ʻana o ko lāua mau ʻohana ʻelua me ka pākela māhanahana o ka inaina, e hōʻike ana ʻo ia ala no ke kūpono ʻole o ka hoʻokae aku o kekahi ʻohana i kahi ma ke ʻano he hoʻokae wale aku nō. He oki loa hoʻi ka hoʻokae aku ma muli wale nō o ka inoa. Wahi a Hoʻonāueueihe, he  mea ʻole ka inoa o ka pua, ʻo ia mau kolopua nō.

Noʻu iho, e kaukaʻi aku ka noʻonoʻo ma luna o ka hōʻike a Pukui no ia mea he inoa, ʻo ia hoʻi, he mana ko laila. Ua hōʻike maila ʻo ia no nā ʻano inoa like ʻole i kapa ‘ia ma luna o kākou kānaka, a na ka inoa nō e alakaʻi i ko kākou ʻano. ʻAʻole naʻe e pau ke kapa inoa ʻana ma laila. Ua kapa ʻia ka inoa o nā ʻāina like ʻole mai ka nui a ka liʻiliʻi, a ua hoʻohana ʻia ua mau inoa ʻāina lā i loko o nā mele a me nā ʻōlelo noʻeau no ka hoʻohanohano ʻana, ka hoʻohalahala ʻana, ka hoʻomanaʻo ʻana i kekahi hana, a ia mea aku ia mea aku. A wahi a Pukui mā, ma loko o ka puke Place Names of Hawaii, he nui hewahewa nā inoa hou o ka ʻāina e haku ʻia nei no nā wahi hou e kūkulu ʻia nei, he hale, he pāka, he alanui, he kaiāulu, a pēlā akula. A ua pau pū nō hoʻi me ke alakaulewa e holo nei ma Oʻahu, a e kaulana nei i ka pipiʻi loa o ke kumukūʻai.

Ua hāpai ʻia aʻe nei he mau inoa no nā wahi hoʻolulu ʻeiwa e kūkulu ʻia nei. Eia ihola nō ua mau inoa lā e like me ko lākou hōʻike ʻia ma ka nūhou. ʻO Kualakai, Keoneae, Honouliuli, Hoaeae, Pouhal(a), Halaulani, Waiawa, Puuloa, a ʻo Halawa. Ua kamaʻāina ua mau inoa nei, ʻoiai he mau inoa ʻāina ia no ia mau wahi, a ʻo ia ke kumu e maopopo ai ka manaʻo a me ka puana ʻana, a me ka moʻolelo paha. ʻO Keoneae naʻe, ʻaʻole au kamaʻāina.

Ua hele nō a kaulana ua alakaulewa nei i kona kūʻē ʻia no ka pūhalalū ʻana o ka moʻohelu kālā i ʻāpono ʻia no kona kūkulu ʻia ʻana. Eia hou, e kāki ʻia ana nā kānaka a pau, akā, ʻaʻole kākou a pau e ʻike ana i ka pōmaikaʻi ke hoʻomaka kona nome ʻana i ke ala hao. No laila, ʻaʻole paha e maikaʻi ke kapa inoa ʻana i ia mau kahua hoʻolulu ma nā inoa ʻāina. Maikaʻi paha ke kapa ʻana i nā inoa no ka hoʻomanaʻo ʻana i ka moʻolelo o ke kūkulu ʻana a me nā mea hoihoi paha o ia mau ʻāpana ʻāina. A no laila, eia au ke hāpai nei i kekahi mau inoa ʻē aʻe.

Eia mai: ʻo Pohākalae, no ka nui o ke kālā e lele kapuahi ana i ke kūkulu ʻia ʻana; ʻo Pīkaʻamo, no ka paʻu mau ʻana o nā limahana; ʻo Honokamanō, no kahi noho o Kaʻahupāhau; ʻo Keonehāneʻe, no ke ʻano paʻa ʻole o ka honua ma ia wahi i kūkulu ʻia ai nā pou; ʻo Keakekālā, no ka ʻānunu o ka poʻe ʻahaʻōlelo e noho ana ma ka ʻaoʻao ʻEwa a e piʻi ana ka waiwai o ko lākou hale; ʻo Alakokopi‘i, no ka hopena o ka ʻai nui ʻana i ke kōpaʻa; ʻo Kalaʻihikalā, ʻoiai he ʻāina wela ʻiʻo nō ia Kona; ʻo Kanuʻaonākānaka, no ka noho paʻapū ʻana o ka poʻe o ia wahi; a ʻo Kaiʻahāmauleo, no ka pipi i ʻane halapohe ma ia kai haumia.

Ua ʻokoʻa ka manaʻo o Hoʻonāueueihe a ʻokoʻa hoʻi ko ka Hawaiʻi. He mana ko ka ʻōlelo, a he mana pū ko ka inoa ʻāina.

Mahuka ka pupule ma Kāneʻohe

na Laiana Wong (ka lā 18 o Nowemapa, 2017)

Synopsis: The escape of Randall Saito from the Kāneʻohe State Hospital this past Sunday sent shivers throughout the island. There is a lot of blame to go around and the protocols definitely need more vigilant enforcement, but more importantly, the health care system needs to provide more effective help to those who need it.

Aloha mai nō kākou. Ua laha aʻe nei kahi moʻolelo nūhou hoʻoweliweli no kēlā wahi kaʻaka i pakele i ka Haukapila Mokuʻāina kaulana ma Kāneʻohe i ka Lāpule nei. ʻO Randall Saito ka inoa a he 59 ona makahiki. I ka makahiki 1979, ua pepehi wale ʻo ia i kekahi wahine i kamaʻāina ʻole iā ia. He pepehi ʻana paha ia e pepehi wale ai nō, a i ka hoʻokolokolo ʻia ʻana o ia hihia, ua hoʻoholo ka luna kānāwai no ko Saito kū ʻole i ka hewa ma muli o kona kūlana hehena, a ua hoʻopaʻa ʻia ma ka haukapila.

Eia ka mea e makaʻu ai ka lehulehu. Ma hope o ko ia ala mahuka ʻana, ʻaʻohe wahi ʻekemu a lohe ʻia mai. ʻAʻohe leo hōlina, no 10 hola! A e nanea ana hoʻi ka lehulehu i ia mau hola, kohu mea lā, ʻo ia mau nō nā mea a pau i ke alo pali hāuliuli o Kāneʻohe. ʻAʻole kā! Ua kau akula ʻo Saito ma luna o ke kaʻa hai a holo akula i ke kahua o nā mokulele hai. Lele akula i Maui a ma laila aku, ua lele i Kaleponi. A hōʻea aku ʻo ia i laila, ʻo ia mau nō ka hoʻolaha ʻole ʻia o kona mahuka ʻana.

Aloha nō ʻo Sandra Yamashiro, ka wahine a Saito i pepehi ai i ka MH 1979. ʻAʻohe āna hana aku iā Saito a pepehi ʻokoʻa maila kēlā. He mea hoʻoweliweli ia ke noʻonoʻo aʻe. He hana hoʻomānaʻonaʻo ko ia ala pepehi ʻia ʻana i koʻu hoʻomaopopo ʻana, a ua komo ka hopohopo no ka lawelawe hou aku o kahi Saito i kāna hana ʻo ka pepehi kanaka. No laila, he koʻikoʻi ka makaʻala mau ʻana i ia ʻano kanaka o kupu hou mai auaneʻi ia ʻano hihia a lilo kekahi wahine hou aku i luapoʻi nāna.

He aha hoʻi ke kumu i kupu mai ai kēia hihia? Eia nō kekahi poʻe limahana o ka haukapila ke hoʻohalahala ʻia nei i ka hewa. A ke hoʻopaʻi ʻia nei lākou ʻaʻole hiki ke hana a ʻaʻole e uku ʻia no hoʻokahi mahina. ʻO lākou anei nā luaahi e pepehi ʻia ana i mea e nā ai ka inaina, a me ka makaʻu o ka lehulehu? Na ka lima ia e lawelawe i ka hana e like me ka manaʻo o ke poʻo. He mau poʻo aupuni ke hoʻokolokolo nei i ka mole o kēia hihia, a eia nō ke uku ʻia nei, i loko hoʻi o ke kō ʻole o ko lākou kuleana. I hewa paha iā lākou i ka miliʻapa ma ka hoʻolaha ʻana. He moloā paha a i ʻole he hoʻopalō me ka manaʻo hana malū, koe aku ia. ʻO ia hopena like nō.

Ua hewa nō paha kekahi o kēlā poʻe limahana ʻehiku. E ʻole ko lākou kōkua loaʻa mai ai ke kālā, nā lole maʻemaʻe, ka likiki mokulele, ke kelepona paʻa lima, a pēlā aku. Ma lalo naʻe lākou o ka nānā ʻana (a nānā ʻole ʻana paha) o kekahi luna aupuni. I hewa paha i ia luna. ʻEā, e ka makamaka heluhelu, ua lawa nō paha ka ʻimihala ʻana. He wā hoʻoponopono kēia i nā hemahema, a ʻo kekahi laʻana nui, ʻo ia ka hoʻopaʻa ʻana i kēlā kanaka i loko o kekahi “haukapila” no nā makahiki he 37 a ʻoi, a ʻaʻohe wahi ola a ʻike ʻia mai. He haukapila ia a i ʻole he hale paʻahao? Kohu mea, ʻaʻohe wehena i laila. Inā e kōkua ʻia ka mea hehena, he kōkua ia no nā kānaka a pau o ke kaiāulu.

He aha lā hoʻi kēlā mea e kau mai ala i luna?

na Laiana Wong (ka lā 11 o Nowemapa, 2017)

Synopsis: Ignorance is revealed in many ways. Knowing one’s place is more valuable than knowing what one might view as fact.

Aloha mai nō kākou e ka poʻe heluhelu o Kauakūkalahale, nā kamaʻāīna a me nā malihini nō hoʻi kekahi. I ʻike ʻia nō ke kamaʻāina o kekahi wahi i kona ʻike ʻana i nā poʻopoʻo a pau o kona ʻāina. ʻO ka malihini ʻike ole i ka helu pō, ʻaʻohe ona hoʻohalahala ʻia mai. ʻAʻole ʻo ia noho ma ʻaneʻi. I koʻu wā e kamaliʻi ana, lohe au i kekahi moʻolelo hōʻakaʻaka, a ua paʻa nō ia moʻolelo a hiki i kēia manawa nō e ʻāhinahina nei ka ʻumiʻumi. I kēia manawa naʻe ua ʻokoʻa koʻu hoʻomaopopo ʻana i ka manaʻo nui o ia moʻolelo, a he haʻawina ʻokoʻa kāna o ka waiho ʻana maila.

I ke aumoe lilo o kekahi pō, a i ka pili paha o ke ao, e inu pia ana ʻelua kānaka i loko o kahi pāka kahakai. I ke kulu ʻana nō o ka pō, e ʻoʻoki mai ana ka ʻona a ka pia, puka maila ka ʻōlelo a kekahi kanaka, penei hoʻi, “ʻEā, nani maoli ka mahina o nēia pō.” Hōʻole akula kona hoa, “ʻAʻole kēlā ʻo ka mahina, e kēnā wahi hūpō. ʻO ia ka lā!” I ia pane kīkoʻolā ʻana mai a ke hoa, ʻo ka māhanahana aʻela nō ia o ke kīkēʻōlelo a hiki i ke kū ʻana o lāua he alo huli aku a he alo huli mai, a kohu moa kākala ua mākaukau ʻo ka lele ʻana o kahi ma luna o kahi.

I ia manawa nō, ʻōlelo maila kekahi o lāua, “ʻEā, e ke hoa, ʻaʻole paha kāua e ʻaʻaka i kahi a me kahi. E aloha nō kāua. E kakali nō paha a kāʻalo mai kekahi kanaka i mua o kāua, a e nīele aku nō kāua i kona manaʻo. A ʻo kā ia ala pane, ʻo ia ana nō kā kāua e ʻaelike ai.”

Ua ʻae maila ke hoa a ʻo ia kakali aku nō ia a ʻōʻili maila kahi kaʻaka Pukikī. Hele nō a kokoke loa maila kēlā, ʻupu aʻela ka nīnau a kekahi hoa, “E ia nei e kāʻalo aku nei. He ui a he nīnau kēia. He aha maila kēlā mea poepoe māʻamaʻama e kau mai ana ma luna o kākou?” I lohe mai ka hana o ka malihini, he kūnānā wale nō ka hana, ʻaʻohe wahi ʻekemu. Hikaʻa lani aʻela naʻe kēlā me ka haka pono aku i ia mea poepoe e māʻamaʻama mai ana. ʻAʻohe wahi pane. Hikaʻa hou aʻela, nānā. ʻO ia hākālia nō a pau kāuna nō hoʻi kona nānā ʻana i ia mea. ʻO ia ihola kona wā i pane mai ai, i ka ʻī ʻana mai penei, “ʻAʻole au ʻike, he malihini au no kēia ʻāina.”

I koʻu lohe mua ʻana i kēia moʻolelo, hū ka ʻaka a kahe ka hūpē. He hūpō nō ia o nā hūpō! A ʻo ia ke ʻano o ia wā. Ua ʻakaʻaka ʻia ka Pukikī i ka hūpō. Eia naʻe, i ka noʻonoʻo hou aʻe i kēia manawa, ke ʻike nei au i ke akamai o ia Pukikī a nui hoʻi koʻu mahalo. ʻO ia hoʻi, he malihini ʻo ia no ia wahi. Inā ua hōʻike mai ʻo ia i nā kamaʻāina i ke ʻano o ia mea poepoe e kau mai ala i luna o ko lāua kulāiwi, inā he hana mahaʻoi nō paha ia. Ua akamai nō naʻe kona hōʻike aku iā lāua i kona ʻike ʻole i ke ʻano o ia mea. ʻAʻole ia ʻo kona kuleana.

ʻEā, he nui nō paha ka poʻe o ka ʻāina ʻē mai e hōʻike mai nei iā kākou kamaʻāina i ke ʻano o ko kākou ʻāina ponoʻī. Kohu mea lā, he hūpō kākou kamaʻāina, a ua pōmaikaʻi nō i nā ʻike a pau a lākou ala e pāhola mai ai. ʻAʻole lā! ʻO kēlā Pukikī ma ka pāka kahakai, ua ʻike nō ʻo ia i ka helu pō!

Ka pūkaʻina kahului pōhili puni honua o 2017

na Laiana Wong (ka lā 4 o Nowemapa, 2017)

Synopsis: The Houston Astros are the 2017 Major League Baseball champions, having defeated the Los Angeles Dodgers in a hard fought seven game series. Houston centerfielder George Springer, who had a tremendous series both at the plate and in the field, was named MVP. His real MVP work, however, might be what he does off the field.

Aloha mai nō e nā hoa puni haʻuki. Iaʻu e kākau nei i kēia moʻolelo, ua pau iho nei ke kahului e wae ʻia ai ka moho pōhili o ka honua nei i ka MH 2017. He pūkaʻina kahului nui loa o ka hoʻopīhoihoi. Ua hiaʻai nō ka poʻe kākoʻo i ka mea lanakila, a ua luʻuluʻu paha ka naʻau o ka ʻaoʻao i eo. A i loko nō o ke komo ʻole o nā kime pōhili ʻoihana a pau loa o ka honua nei, ʻaʻole paha e hihi. Nui nā ʻālapa o nā mokuʻāina ma waho aku o ʻAmelika i helu pū ʻia ma nā papainoa o nā kime o nā ʻahahui nui ʻelua, ʻo ke Kuʻikahi Pōhili ʻAmelika a me ke Kuʻikahi Pōhili Aupuni. A ma hope o ka paio māhanahana ʻana, ua lilo ke eo i ke kime o Houston, o ke Kuʻikahi ʻAmelika, a ua hāʻule ke kime o Loa Angeles.

Ma ia pūkaʻina pōhili, ua kau mai ka moʻomōʻali hou no ka heluna o nā pā ʻai holo puni i ka 25. ʻO ia nō paha ke kumu i pīhoihoi loa ai ka poʻe punihia i ia hana hoʻonanea he mākaʻikaʻi pōhili. ʻEā, aia nō kekahi poʻe mākaʻikaʻi i mahalo nui i ke akamai o ka poʻe nou pōpō, a he ʻoiaʻiʻo, aia nō kekahi mau komo ʻana i ʻike ʻia ai ke akamai o ia poʻe i ka māhuahua mai o nā lilo hala. Eia naʻe, ʻaʻole nō e like ia mahalo ʻana me ka mahalo i ke akamai o ka poʻe kūhili nāna e hili i ka pōpō me ka pāpono, a me ka lele hoʻi a hala ka pā. He ʻilihia ka noʻonoʻo ke ʻike aku, ma ka pāka ponoʻī a ma ke kīwī paha, ʻaʻohe wehena o ka hiaʻai.

Ma ka hopena, ua lilo iā George Springer o Houston, ka makana no ka ʻālapa waiwai loa (MVP) o ia pūkaʻina kahului. Ua kapa ʻia ia makana ma hope o ka inoa o Willie Mays a ua hāʻawi ʻia i ka ʻālapa nui loa o ka waiwai i kona kime. I loko o kēlā mau pāʻani kahului ʻehiku, ua maikaʻi loa kona pākaukani hili, he .376, a me kāna mau pā ʻai holo puni he ʻelima. Ua maikaʻi loa hoʻi kona pāʻani ʻana ma ke kūlana kūwaho, koe wale nō kekahi manawa āna i palaha aku ai i ka mauʻu ma ka hoʻāʻo ʻana e ʻapo i kekahi pōpō i hili ʻia ma ka laina me ka hāʻule koke ʻana ma mua o ka hōʻea mai o kona mikilima i laila, a holo pākākā wale aku a hiki i ka pā i waho o ke kula waena, a ua lilo kekahi ʻai iā L.A. Eia naʻe, ma ia komo ʻana aʻe, ua hahau ʻiʻo ʻo ia i ka pōpō. ʻO ka lele ia a hala ka pā, a poina ihola ia hemahema.

Ma koʻu heluhelu ʻana e pili ana iā George Springer, ua hoihoi kekahi mau ʻōlelo no kona piliolana. Ua hōʻike ʻia kona hoʻoikaika ʻana ma ka hoʻoponopono i kona pilikia ma ka hoʻopuka ʻōlelo ʻana. Wahi a ka moʻolelo, he ʻūʻū ka leo ke puana aku i kāna mau huaʻōlelo. A i kēia mau lā, he nui kāna mau kālā e hāʻawi manawaleʻa ana i nā hui kōkua, a he wahaʻōlelo nō hoʻi ʻo ia no ka SAY Foundation ma Houston, he hui nāna e kōkua i nā keiki i pilikia ko lākou puana ʻana. He MVP maoli nō ʻo ia ma nā ʻano a pau.

Pehea lā ka puana ʻana i ka wē?

na Laiana Wong (ka lā 28 o ʻOkakopa, 2017)

Synopsis: The “w” in Hawaiian today is sometimes pronounced like an English “w” and sometimes like an English “v”. What’s up with that?

Aloha mai kākou. ʻO kēlā nīnau e kau maila ma luna, he nīnau wāhi pūniu ia, no ka mea, ʻaʻole i mōakāka ke ʻano o ka puana ʻia o ka “w” ma ka ʻōlelo Hawaiʻi a ua hele a ʻano huikau ka poʻe ʻōlelo Hawaiʻi o kēia au. Lohe ʻia he “w” i kekahi manawa, a he “v” i kekahi manawa. A ʻo ka nīnau nui hoʻi: Ua pili anei ia lolelua i kahi o ka ʻōlelo e puka mai ai ia hua? ʻEā, e ka mea heluhelu, ke hāpai ʻia nei kēia kumuhana i mea e hōʻike ai i ke ʻano hōkai mai o ka noʻonoʻo haole i loko o ka ʻōlelo Hawaiʻi.

Hoʻomanaʻo aʻela au i ka nīele ʻana aku i kaʻu kumu ʻōlelo Hawaiʻi ma ka papa makua o ka Pūnana Leo he 28 makahiki aku nei. Nīnau akula au iā ia no ke ʻano pololei o ka puana ʻana i ka huaʻōlelo “Hawaiʻi”?” Pane maila ʻo ia ala ua lohe ʻia he ʻehā ʻano puana ʻana, ʻo ia hoʻi ʻo Hawaiʻi, Hawaʻi, Havaiʻi, a me Havaʻi. Aloha nō. ʻO ia mau huikau nō o kahi keiki ʻike ʻole i ka puana Hawaiʻi.

Ma ia hope mai, ua hoʻi au i ka ʻimi naʻauao ma ke Kulanui a ʻo ia mau nō ka pohihihi o ia hua he “wē”. Hoʻomaopopo aʻela au i ka haʻi ʻōlelo a kahi polopeka no ka hoʻopuka ʻia o kēia mau puana hualeo ʻelua (w a me v) no ka hualeo hoʻokahi. ʻōlelo maila kēlā, ua pili nō ka puana i ke ʻano o ka woela e hahai mai ana. ʻO ia hoʻi, inā he “a”, he “e”, a i ʻole he “i” ke hahai ana, e puana ʻia ka hualeo [w] e like me ka “v” ma ka ʻōlelo haole, a inā he “o” a he “u” paha ke hahai mai ana, ua puana ʻia ma ke ʻano he “w” ma ka ʻōlelo haole. A ʻo ke kumu mai, he ʻano pilina ma waena o ia mau woela (o me u) a me ka “w” ʻoiai ua mōkio maila nā lehelehe ma ka hoʻopuka ʻana. He manaʻo maikaʻi paha ia, eia naʻe ka mea ʻāpiki, ua puana ʻia ka huaʻōlelo “woela” me ka “v”. He kūʻē lula paha?

He haumāna kālaiʻōlelo au ma ke Kulanui i ia mau lā a komo akula i loko o ka papa kālaileo a ke kauka Albert J. Schutz. Wahi āna, he mau kani ia nāna e hoʻopilipili i nā hualeo haole, a ʻo ke kani Hawaiʻi o ke au kahiko, aia ma waena o ia mau kani ʻelua (v a me w). ʻōlelo maila ʻo ia, he hana ʻia ka “v” o ka ʻōlelo haole ma o ka hoʻopili ʻana i ka pae niho o luna me ka lehelehe o lalo, a ʻo ka “w” hoʻi, ua hana ʻia ma o ka hoʻomokio ʻana i nā lehelehe ʻelua, a ʻaʻole e hoʻopili ʻia.

Wahi āna, ua ʻokoʻa ka hoʻopuka ʻana o ka poʻe kahiko i ia kani. Hoʻopuka ʻia ke ea ma o nā lehelehe ʻelua i ʻano pili koke i kahi manawa a kaʻawale hoʻi i kekahi manawa. Inā ua pili, e ʻānai ʻia nā lehelehe ʻelua e ke ea a ʻo ia ka puka ʻana mai ia o ke kani kapalili o nā lehelehe, he “v” ke lohe aku. Inā e kaʻawale nā lehelehe, puka wale mai ke ea me ka ʻānai ʻole aku i nā lehelehe a ʻaʻole kani kapalili e lohe ʻia, he kohu “w” ke lohe aku.

Ua kū mai ka ʻōlelo haole i ka moku, a i mea e hoʻopilipili ai ka poʻe haole i ke ʻano “v” o ia hua, ua pā ka lehelehe i ka niho e like me ka hana ma ka ʻōlelo haole. He ala ia i komo malū ai ka ʻōlelo haole i loko o ka puana Hawaiʻi. Hoʻokahi wale nō ia laʻana no ka loli ʻana o kā kākou ʻōlelo. Auvē!

He maʻi ʻino e huikau ai ka waihona noʻonoʻo

na Laiana Wong (ka lā 21 o ʻOkakopa, 2017)

Synopsis: Researchers are making headway in their efforts to understand the causes of Obsessive Compulsive Disorder. Interestingly, some of the genes in which ceratain mutations occur that seem to be linked to OCD are the same as those found in animals with similar disorders.

Aloha mai nō kākou e nā hoa heluhelu o Kauakūkalahale. E mahalo nō kākou i ka mea loaʻa, ke olakino maikaʻi a me ka paʻa mai o ia mea he mōakāka o ka noʻonoʻo. He pōmaikaʻi nui ia i loaʻa ʻole i ko kākou poʻe hoa kanaka a pau. Aia nō kekahi poʻe i pilikia ko lākou hoʻomaopopo ʻana i kā lākou hana i hana iho nei, e laʻa ka holoi lima. ʻO ia hoʻi, i ka pau ʻana o ia hana, ʻaʻole nō a he wā, e holoi hou aku nō i ka lima. Kohu mea lā ua poina loa ia holoi mua ʻana.

He ʻano maʻi kēia e lilo ai ka hoʻokō ʻana i kekahi hana maʻa mau he pulakaumaka no kekahi poʻe. Aloha nō ka poʻe i loaʻa i kēia ʻano maʻi. ʻAʻole hiki iā lākou ke hōʻalo i ka hana pinepine ʻana i kahi hana maʻalahi e laʻa ka laka ʻana i ka ʻīpuka, ka holoi ʻana i ka lima, ka hīmeni pinepine ʻana i kekahi mele ma loko o ka noʻonoʻo, a me ia mea aku ia mea aku. I ka manaʻo o kēia poʻe, ʻaʻole i laka ʻia ka ʻīpuka, ʻaʻole i holoi ʻia ka lima, a ʻaʻole i hīmeni ʻia aʻe nei ke mele. E koikoi hewa ʻia lākou e hoʻokō i ia hana i loko nō o ke kō pono ʻana ma mua. He minamina ka loaʻa ʻana o ko kākou mau hoa kanaka i kēia maʻi a he mea ʻano ʻē hoʻi ke ʻike aku. Kohu ʻīlio i ke alualu ʻana i kona huelo. He pono alualu wale nō kēlā. ʻAʻohe nō a he wā e loaʻa ai.

Ua kapa ʻia kēia maʻi ma ka ʻōlelo haole ʻo ka OCD, Obsessive Compulsive Disorder, a ke kapa nei au i ia maʻi hoʻokahi ma ka ʻōlelo Hawaiʻi he maʻi kuko hoʻokō. Ua ʻikea ke alualu ʻana o ka ʻīlio i kona huelo, akā, ʻo nā ʻīlio i nānā ʻia ma kēia papahana noiʻi, e noke aku nō i ke alualu a hala he mau hola. Kohu mea lā he ʻiʻini nui e koikoi nei i ka hoʻokō ʻana i ia hana, a ʻaʻole hiki ke waiho wale i ia pulakaumaka.

A he aha lā ke kumu e kupu mai ai kēia ʻano maʻi? Aia nō paha ka mole i ia mea he ʻōewe. Ua loaʻa mai i kekahi poʻe noiʻi he wahi ʻike hou e hoʻākāka iki mai ana i ka hāʻina o kēia nīnau wāhi pūniu. ʻO ia hoʻi, ma ka nānā ʻana i nā ʻōewe o kekahi mau holoholona (ʻo ka ʻīlio, ka pōpoki, a me ka ʻiole), nā ʻōewe nāna i hōʻike mai i nā hōʻailona o kēia maʻi, a i ka hoʻohālike ʻana hoʻi me nā ʻōewe o kākou kanaka, ua loaʻa mai he ʻehā ʻōewe pili i kēia maʻi, aia ma loko o nā holoholona a me kākou kanaka kekahi.

Ke manaʻo nei ka poʻe e noiʻi nei i kēia hihia, ua ʻāhuli ke ʻano o ia mau ʻōewe a ʻano ʻokoʻa maila, a ua lilo ia ʻāhuli ʻana i mea e pau ai ka hoʻokaʻa ʻana i ka ʻike ma waena o nā hunaola aʻalolo a pio ai hoʻi kekahi mea nāna e hoʻōki i ka hana mau ʻana o ke kanaka i kāna hana me ke kuko nui e hoʻokō.

He pōmaikaʻi ka loaʻa mai o kēia ʻano ʻike. Maliʻa o lilo ia i mea e  lapaʻau ai i kēia maʻi weliweli ʻo ke kuko hoʻokō. He ola ia e pono ai kānaka, a e pono ai hoʻi nā holoholona huikau o ka noʻonoʻo.