Kīhēhē wale aku ka poʻe Hawaiʻi i ke au iā Maleka

na Kekailoa Perry a me Laiana Wong (ka lā 27 o Ianuali, 2018)

Synopsis: A court case on Maui has brought attention to Hawaiian rights with respect to the domains of language use. Kaleikoa Kaeo has chosen to present his case through the medium of Hawaiian, but the judge has denied his right to do so. As his rights are stripped away, he becomes increasingly invisible; and so do we.

Aloha e ka poʻe aloha o ka ʻāina, ka poʻe hoʻi e kīhēhē wale aku nei i ke au iā Maleka.

I ka Pōʻakolu nei, ua ʻike ʻia ka hana ʻepa a ka ʻoihana kānāwai. He ʻoihana ia e kū kalaʻihi nei ma luna o nēia ʻāina aloha o kākou, ka mea hoʻi i kāʻilikū ʻia e ka lima ʻapakau ʻānunu o kahi Maleka. A e like me ke kāʻili ʻia o ka ʻāina, hopu ʻia maila kekahi keiki aloha o ka ʻāina e kahi ʻākena o ua Maleka nei, ʻo ia hoʻi, ka Mokuʻāina ʻo Hawaiʻi. ʻO kona hōʻāhewa ʻia nō ia e kēlā aupuni hoʻopunipuni no kauwahi hala mikamina a koikoi ʻia ʻo ia e hele aku i mua o kahi luna kānāwai o Maui. A i kona kū ʻana i loko o ka hale hoʻokolokolo, kāhāhā, ua kīhēhē wale aku a nalo hoʻi i mua pono o ke alo! Kohu mea lā, he pule hoʻokalakupua na ke kānāwai o Maleka kona mea i nalo ai.

ʻO ka ʻoiaʻiʻo, ua nalo ua keiki nei ma muli o kona koho ʻana e koikoi i kona pono ma o ka hoʻopuka ʻana i kona manaʻo ma o ka ʻōlelo Hawaiʻi, he ʻōlelo kūhelu no Hawaiʻi nei, a he pono hoʻi i hoʻomalu ʻia ma lalo o ke Kumukānāwai o ka Mokuʻāina ʻo Hawaiʻi, ma ka ʻatikala XV, māhele 4. Eia naʻe, i mua nō ka ʻulu a hala! Ua noke aku ua luna kānāwai nei e hoʻomakapō, a e hoʻokuli hoʻi, me he mea lā, ʻaʻole hiki iā ia ke ʻike maka i ua keiki nei o ka ʻāina, a ʻaʻole hiki ke lohe pepeiao i kāna mau ʻōlelo naʻauao.

I ka hopena, ua hōʻole ʻia ka pono o ua keiki nei, a hōʻole pū ʻia hoʻi me nā pono o kākou a pau. Auē! ʻO ua keiki nei naʻe, ua kūpaʻa ʻiʻo nō ma hope o kona manaʻo he pono, a ʻo ka pūhili loa o kahi luna kānāwai, ʻo kona hoʻopuka akula nō ia i kekahi palapala e koikoi ana i nā mākaʻi e hopu i ke keiki. He aha lā ke ʻano o kahi luna? I loko nō o ke kū ʻana o ua keiki nei i mua pono ona, ʻōlelo pololei akula nō ʻo ia iā ia me ka hea ʻana aku i kona inoa, penei, “I’m going to give you another opportunity Mr. Kaeo to identify yourself.”  ʻO ia nō ka wā i pane aku ai ʻo ia ma ka ʻōlelo Hawaiʻi me ka hōʻike ʻana aku ē ʻo ia nō ʻo Samuel Kaleikoa Kaeo. Na wai e ʻole ka ʻike i ka inoa o kekekahi kanaka ua kapa pololei ʻia aku ma o kona inoa ponoʻī? Kupanaha!

Eia hoʻi ka mea ʻino loa. Ua hoʻoweliweli mai kahi luna kānāwai iā Kaleikoa penei, “Until you speak English Mr. Kaeo, you will be considered not here.” Ua kīhēhē ʻo Kaleikoa no kona noke ʻana i ka hoʻopuka aku i kona manaʻo ma o ka ʻōlelo makuahine o nēia paeʻāina. A ma o ua ʻōlelo lā ʻo ke kīhēhē akula nō ia o kona pono, a me ka pono hoʻi o kākou a pau.

Ua puni wale kākou i ke kaena ʻana a Maleka ē he kaulike kona ʻano, a ʻaʻohe ona wahi kamawae. Ua like a like ka pono o nā kānaka a pau. Mai nō a puni! Hoʻokahi wale nō ʻōlelo lohe a kēlā luna kānāwai o Maui. No laila, e huki like kākou a hoʻopuka aku i ko kākou ʻōlelo makuahine ma nā wahi a pau!

Kani ke oeoe, he piʻoloke ko ka ʻāina

na Laiana Wong (ka lā 20 o Ianuali, 2018)

 

Synopsis: The nuclear missile alarm caused serious consternation, but people remained courteous on the roads. As for the assignment of blame, we should look no further than the two despotic leaders that are peddling fear. Lock ‘em up and let ‘em fight each other.

Aloha e nā hoa ʻalo like o ka ʻīnea, nā hoa nō hoʻi i hoʻomanawanui like i kēlā piʻoloke launa ʻole o ke kupu ʻana maila i kēlā Pōʻaono aku nei. A i kēia manawa a ma kēia hope aku nō hoʻi, ʻaʻole paha e poina ka lono kuhihewa i kukuʻi maila no ka lele mai o kahi kao lele pahū a Kōlea ʻākau i hoʻōlapa mai ai. Aia nō ma hope mai o ka hola ʻewalu, kakahiaka, ua kani ke oeoe e hahaʻi mai ana i ia lono e kū ai ka weli o ka lehulehu. A eia au, kahi kanaka oʻo, i loko o ka wā nāwaliwali loa o ka hoʻomaopopo ʻana, ʻaʻole naʻe paha e poina ia mea i nā lā e koe ana!

ʻEā, e nā hoa heluhelu, eia mai kahi nīnau maʻa mau, ma hea ʻoukou i ka wā i kani mai ai ua kūkala hewa nei? ʻO au hoʻi, e kalaiwa ana mai Kāneʻohe aku a i ke kūlanakauhale no ka hele ʻana i kekahi hālāwai. Kani maila ka leo hohō o kahi kekake ma loko mai o kaʻu kelepona, a he kani hoʻonāukiuki ʻiʻo nō e hiki ʻole ai ke huli kua ʻia. Komo ʻiʻo nō ka nīele i loko oʻu. Ua nui koʻu ʻiʻini e heluhelu i ka nūhou i hoʻouna ʻia maila, akā, makaʻu au o loaʻa mai i ka mākaʻi. No laila, e holo naʻaupō ana a hiki aku au ma ke alaloa. I ia manawa, kāhea maila kaʻu wahine no ka hahaʻi mai i ka lono.

I lohe aku ka hana oʻu, kaha akula, piʻi ma ke alanui Pali no ka hoʻi ʻana i Kāneʻohe, kahi e noho pū ai me ka ʻohana. I koʻu wahi hoʻomanaʻo ʻana, aia ma kahi o ka 8 a 10 wale nō minuke noʻu e ʻimi ai i kahi malu. ʻO ka ʻoiaʻiʻo naʻe, ʻaʻohe wahi ala e pakele ai, a no laila, ʻo ia kalaiwa mālie aku nō ma ke ʻano mau a hōʻea i ka hale. Kohu mea lā, pēlā ka manaʻo o nā kānaka ʻē aʻe, a no ka mea, ʻaʻohe kaʻa e holo pupule ana i ke alanui. ʻAʻohe wahi ʻano o ka piʻoloke a ʻike ʻia ma ia wā weliweli, koe wale nō kekahi mau kaʻa e kū ana ma haʻi o ke alanui, a e kamaʻilio ana ke kalaiwa ma ke kelepona. A i ke kokoke ʻana aku i ka hale, ua kāhea hou mai kaʻu wahine me ka nūhou maikaʻi e maha ai ka naʻau. He pūlapu wale nō ka hana!

I ka hoʻokolokolo ʻana i ke kumu o ia kūkala hewa ʻana, ua kuhikuhi ʻia kahi limahana akahana ʻole. ʻO ka huhū o ka lehulehu no ko lākou hoʻohemahema ʻia, hoʻohalahala ʻia akula ua limahana nei a hoʻohalahala pū ʻia ke aupuni mokuʻāina i ka hāwāwā o kona ʻōnaehana kūkala pōʻino. Aloha nō ua kanaka nei. Ua hoʻopau ʻia kona kuleana ma ia keʻena a hoʻoneʻe ʻia i kahi ʻē. ʻEā, ʻo kona luna paha ke hoʻopaʻi ʻia no ka hemahema o ko lākou ʻōnaehana!

ʻO ka ʻoiaʻiʻo, i hewa nō iā Huli lāua ʻo Kim Jong Un. E ʻole kā lāua mau ʻōlelo hūpō a hoʻoweliweli hoʻi i kahi a me kahi, weliweli ko kākou nohona i kēia mau lā. E aho paha ka hoʻopaʻa ʻana i ia mau aliʻi hehena i loko o kahi pahu liʻiliʻi kahi e ʻāʻumeʻume ai. Hiki nō iā kākou ke hoʻopoina iā lāua a kāpae hoʻi i ka haʻalulu a me ka pīhoihoi, a noho mau aku nō i loko o ka maluhia!

ʻInoʻino ke kai ua ʻau ʻia e ke kae

na Laiana Wong (ka lā 13 o Ianuali, 2018)

Synopsis: Unusually high levels of enterococci bacteria have been reported in the waters off at Ala Moana beach. In fact, there is about eight times the allowable amount. It is not known what has caused the spike in bacteria, but people are being notified not to swim there.

Aloha mai kākou e nā hoa heluhelu. Ua hele nō paha a he mea hoʻopākūā koʻu kākau mau ʻana no ia mea he kūkae (i ʻike ʻia i loko o ke poʻo manaʻo ma luna aʻe nei), a eia nō ke hoʻohuoi nei nō paha kekahi o ʻoukou he pulakaumaka kēia kumuhana noʻu. ʻEā, e hōʻole a e aha? Ua pololei paha. I ka lā 23 o Kēkēmapa i kēlā MH aʻe nei, ua kākau au i kekahi moʻolelo no ka pilikia o nā luawai pelapela a me ke akamai o ka hoʻokomo ʻana i kekahi pahu hoʻomaʻemaʻe wai ʻino. He mea mālama ʻāina ia, a he mālama kai nō hoʻi kekahi.

ʻAʻole lawa koʻu ʻau ʻana i ke kai i kēia mau lā. ʻAʻole hoʻi e like me koʻu wā uʻi. I ia wā, he hele mau nō i ka ʻau kai a me ke kaha nalu paha. A i koʻu hoʻomaopopo ʻana, ua aʻiaʻi a ua maʻemaʻe hoʻi nā kapakai a pau. A lawa ka au ʻana, a i ka piʻi hou ʻana mai i kahaone, ua ʻoluʻolu nā mea a pau. I kēia mau lā naʻe, ma kauwahi kahakai, ua hele a lēʻī hoʻi, aia i ka nuʻa nā kānaka. He poʻe malihini a he poʻe kūloko hoʻi kekahi. ʻO ka nui o ia poʻe, ua hapa mai ke aʻiaʻi a me ka maʻemaʻe. A i kēia mau lā, he poʻe ʻepekema nāna e makaʻala i ke kūlana maʻemaʻe a maʻemaʻe ʻole paha o ka wai, i kēlā me kēia lā, ma o ke ana ʻana i ka nui o ia mea he enterococci. He koʻohune ia a he mea hoʻi e maʻi ai kākou kānaka.

He helu ʻia ka nui o nā enterococci i loko o 100 mililika wai, a inā he 130 anakahi a ma lalo mai paha ka heluna, ua lawa ka maʻemaʻe e ʻauʻau ai. Ke piʻi mai naʻe kēlā helu he mau manawa i loko o ka mahina hoʻokahi, e pāpā ʻia ke komo ʻana i ke kai ma ia wahi, a hiki i ka maʻemaʻe hou ʻana mai. ʻO ka ʻoiaʻiʻo, he hōʻailona ke kāpili ʻia mai ma ia wahi kokoke aku nō nāna e haʻi mai ana i ka lono. He nānā ʻia paha he hulikua ʻia paha, aia nō i ke kanaka. Wahi a ka poʻe o ka ʻOihana Mālama Olakino, ʻaʻole hiki ke hōʻoia ʻia ke ʻano ʻino o nā enterococci, akā, he mea koʻikoʻi ka hoʻāʻo ʻana ma kekahi keʻena hoʻokolohua ma mua o ka wehe ʻana mai i ka hōʻailona.

I ka pule nei i hala, ua piʻi loa ka helu o nā enterococci ma kahakai o Ala Moana i ka 1013 anakahi i loko o 100 mililika wai. He ʻaneʻane pāwalu ka nui a he mea ia e hoʻopaʻa ʻia ai ua kahakai nei. ʻAʻole maopopo i ka poʻe o ka ʻOMO ke kumu i piʻi loa mai ai kēlā helu. Eia nō lākou ke ʻimi nei. I kēia wā naʻe e kuʻihē nei ko kākou noʻonoʻo, he akamai paha ke kaʻakepa ʻana. E kaha aku nō, hele i kahi ʻē.

Eia nō ka mea ʻāpiki. Aia nō i loko o kēlā inoa ʻepekema, enterococci, ke peʻe nei kahi ʻike e piʻi ai ka manene. ʻO ia hoʻi, ʻo kekahi manaʻo o ia mea, he kūkae no ke kanaka a no kekahi māmela paha. He hoʻopailua ke noʻonoʻo aʻe, a he mea hoʻi e koikoi mai ana iaʻu e hōʻalo i ia wahi. No laila, eia au ke kākau hou nei no kēia kumuhana i mea e hoʻomaopopo ai iā kākou, he aliʻi ka ʻāina a he kauā ke kanaka. Inā ʻaʻole kākou e mālama i ka ʻāina, ʻaʻole nō ia e mālama mai iā kākou.

Halihali ʻia ka huaale lāʻau pā ma ka leka

na Laiana Wong (ka lā 6 o Ianuali, 2018)

Halihali ʻia ka huaale lāʻau pā ma ka leka

na Laiana Wong

Synopsis: A pilot program involving four states, including Hawaiʻi, that offers abortion approval by teleconference with a doctor has invited protest. Is this about abortion rights or abortion procedures?

Aloha mai kākou. Eia aʻe kahi mea hou ke hiki maila i o kākou nei, ʻo ia hoʻi, ka halihali ʻia mai o ka lāʻau pā ma o ka leka. He polokalamu pekelala kūikawā ia (ma lalo o ka mana o ka ʻOihana Lāʻau me ka Meaʻai) e hoʻāʻo nei i ka pono a me ka ʻole o kēia hana, he hana e pono ai nā wāhine e manaʻo nei e hoʻopau i ko lākou hāpai ʻana. I kēia mau lā ma Maui a me Oʻahu, ua hiki nō i ke kauka ke kuhikuhi aku i ka lāʻau e pono ai ia hana. A hiki nō hoʻi ke hana ʻia me ka hālāwai ʻole aku me ka wahine he alo a he alo. He koina ia ʻano hālāwai ʻana ma mua, eia nō naʻe ia ke hana ʻia nei ma o ke kelewikiō ʻana i kēia manawa. Inā ʻaʻole i piha he 10 pule o ka hāpai ʻana, ua hiki nō i ka wahine ke ʻoka aku i nā lāʻau ma hope o ia hālāwai kelewikiō ʻana, a ʻaʻohe nō a he wā, e hōʻea mai nō ia i ka pahu leka.

He ʻelua lāʻau e pono ai kēia ʻano hoʻopā ʻana, ʻo ka mifeprex a me ka misoprostol, he mau huaale ia. Ma hope o ka ʻai ʻana i ia mau ʻano huaale ʻelua, ʻo ka hoʻomaka nō ia o ka hana, a ma hope o ʻekolu hola a hiki aku paha i ka ʻewalu, pau loa nō ka hāpai ʻana o ka wahine. Wahi a ke kauka Ghazaleh Moayedi o ke Kulanui o Hawaiʻi, kekahi kauka e hana nei ma lalo o kēia polokalamu, ua ʻano like ia hana me ka hoʻopoholo ʻana a hāʻule ka ʻaluʻalu. ʻōlelo maila kēlā he hana ia e lawelawe ʻia nei e nā wāhine i kēia manawa koe wale nō ʻaʻole e koikoi ʻia ko lākou ʻai ʻana i ka huaale i mua o ke alo o ke kauka e like me ma mua.

Aia nō kekahi poʻe e kūʻē nei i kēia polokalamu. Ke hopohopo nei lākou o kupu mai auaneʻi kahi mau kuʻia e pilikia ai nā wāhine. ʻO au naʻe, ke hoʻohuoi nei i ke kumu o kēia kūʻē ʻana. Maliʻa, he kūʻē ia i ke kuleana o ka wahine e koho ai i kēia ʻano hana. Eia naʻe ka mea ʻāpiki, ʻoiai ʻo au kekahi e kākoʻo nei i ia kuleana o ka wahine e koho ai no kona pono iho, ke hopohopo nei hoʻi i ka halihali ʻia o kēia mau huaale ma o ka leka. Maliʻa o kiʻi mai kahi keiki a ʻai, a i ʻole ia, e lilo aku paha i ka ʻaihue. ʻAʻole naʻe e hihi. He nīnau ia no ke ʻano o ka halihali ʻana. He nīnau ʻokoʻa ko ka ʻai ʻana.

I ka wā kahiko, wahi a Pukui, Haertig, a me Lee ma kā lākou puke “Nānā i ke Kumu”, he hoʻohana ʻia nō kēia lāʻau hoʻopā ʻaluʻalu i ka wā kahiko. Ua ʻike ʻia i loko o nā ʻohana aliʻi inā ua haʻahaʻa loa ke kūlana o kekahi o nā mākua. Eia hou, ua ʻike ʻia ka manaʻo o ka poʻe kahiko he pono ka hoʻokōwā ʻana i ka hānau keiki hou a ikaika mai ke keiki e ola nei. A no laila, aia nō kekahi mau hana i lawelawe ʻia i ia wā. ʻO ka ʻapu hoʻopā kekahi i hana ʻia i emi mai ai ka nui loa o ka hānau ʻana. Aia nō hoʻi ka hoene a ʻo ka hoʻō ʻana i nā lau ʻawa i loko o ke kohe kekahi mea e hoʻopoholo ai i ka ʻaluʻalu. Eia hou, i kekahi manawa, he ʻōmilomilo ka hana, ʻo ia hoʻi ka hoʻō ʻana i kahi lāʻau ʻoi i loko o ke kohe.

He mau hana ia na ko kākou mau kūpuna i lawelawe ai, no laila, ʻaʻohe kumu e kūʻēʻē ai. ʻO ka halihali ‘ia o kēia ʻano lāʻau ma o ka leka; e akahana aku nō kākou.

E kū kaʻeo i ke kalaʻihi o Maleka

na Laiana Wong a me Kekailoa Perry (ka lā 30 o Kēkēmapa)

Synopsis: Whereas Hawaiian is one of two official languages of the State, a defendant should be allowed to present a defense in Hawaiian, and not be forced to operate within the limitations of English.

Aloha hou mai nō kākou e nā hoa kanaka e paʻu nei i ia hana ʻo ka hoʻōla ʻōlelo makuahine. I ka MH 1978, ua palapala ʻia akula kahi kānāwai mokuʻāina e paipai ana i kā kākou ʻōlelo makuahine i ʻōlelo kūhelu. He ʻoliʻoli ʻiʻo nō. Ua hoihoi naʻe kēia hanana, no ka mea, ʻo ia nō ka ʻōlelo e kū ana i ka moku ma mua loa o ka hōʻea mai o ka namu haole. He aha ke kumu e hoʻokūhelu ʻia ai ka mea maoli? A i kūhelu hoʻi iā wai? A i kēia manawa, ke ʻike nei kākou he kūhelu hoʻopunipuni wale ia. Aia nō kekahi paukū ma ia kānāwai e hoʻohaʻahaʻa ana i ke kūlana o ka ʻōlelo Hawaiʻi ma lalo o ka namu haole. Penei hoʻi, inā e ʻokoʻa ka manaʻo haole a ʻokoʻa hoʻi ka manaʻo Hawaiʻi o kekahi kānāwai, ʻo ka mana haole ke nānā ʻia. A ʻo ka mea ʻāpiki, ua lilo ke kuleana i nā hale hoʻokolokolo Maleka e hoʻokolokolo ai i nā hihia a pau ma o ka namu haole. Eia kā, ua hoʻokuleana lākou iā lākou iho nō, a ua hapa mai ka ikaika o ka ʻōlelo Hawaiʻi ma ko kākou ʻāina ponoʻī iho nō.

I ka P3 o ka pule nei, ua kupu maila kekahi hihia e emi ai ka pono o kākou Hawaiʻi. Ua hoʻoholo ʻia akula e kekahi luna kānāwai o ka mokuʻāina ʻo Hawaiʻi, ma lalo o ke kaumokuʻāina ʻo Maleka, kekahi nīnau no ka hihia o Kaleikoa Kaeo, he kanaka aloha ʻāina no Maui, i hōʻāhewa ʻia akula i ke ʻano ʻino o ka hana, ka ʻākeʻakeʻa i ke alapīpā, a me ka hoʻokuli ʻana i ke kauoha a ka mākaʻi. Ua pili ia nīnau i ka ʻōlelo e hoʻokolokolo ʻia ai ua hihia nei, ʻo ka namu haole paha, a ʻo ka ʻōlelo kanaka paha. Ua koho ʻia ka namu haole, a ʻo ke kumu mai, ʻo ia nō ka hoʻomakauliʻi ʻana i ke kālā. Penei hoʻi ka manaʻo o ka luna kānāwai, ʻoiai ua hiki nō iā Kaleikoa ke hoʻomaopopo i ka namu haole, e hoʻokolokolo ʻia ka hihia ma loko o ka namu haole.

Aloha nō kahi luna kānāwai ʻike ʻole i ke ʻano o ia mea he ʻōlelo. Pehea lā ke akamai o ka mea unuhi, ʻaʻole nō e like a like ka manaʻo o kekahi ʻōlelo me kona manaʻo ke unuhi ʻia ma kekahi ʻōlelo. Inā e manaʻo ana ka mea i hōʻāhewa ʻia aia kona pono i ka pale aku i nā hōʻāhewa ʻana ma o kekahi ʻōlelo, e pale aku nō ʻo ia pēlā. Ke manaʻo nei ua ʻo Kaleikoa ʻo ka ʻōlelo Hawaiʻi ka mea e akāka loa ai kāna mau hana a me kona mau kumu i hana ai, a pēlā hoʻi e ʻike ʻia ai kona pono. No laila, ʻaʻohe wahi kaulike o kona koikoi ʻia e hōʻike aku i kona manaʻo ma o ka namu haole.

He aha lā hoʻi ke kumu e hōʻole ʻia nei ko ia ala noi e pale aku i nā hōʻāhewa ma o ka ʻōlelo a kona mau kūpuna? He hoʻomakauliʻi paha i ke kālā, he hāwāwā paha ko ke aupuni ʻike ʻole i ka ʻōlelo Hawaiʻi, a i ʻole ia, he hana ʻāpiki paha ia e hapa mai ai ka ikaika kūpale o ke kanaka Hawaiʻi a kōkua ai hoʻi i ka ʻākena o Maleka i ka hoʻohaʻahaʻa ʻana i ka pono o ka poʻe Hawaiʻi. Eia nō ʻo Kaleikoa ke naʻi nei i ka pono o kona mau hoa lāhui, a ke kū kaʻeo nei i ke kalaʻihi o Maleka. E ala e nā hoa kanaka! E huliāmahi hoʻi o hapa mai ko kākou pono!

 

Nō ka wai ʻino, ʻinoʻino ka ʻāina

na Laiana Wong (ka lā 23 o Kēkēmapa, 2017)

Synopsis: Many homes in Hawaiʻi are still utilizing cesspools to handle waste water. This is not a sustainable practice as it could ultimately seep into our sources of drinking water.

Aloha e nā hoa kanaka o ka noho pū ʻana ma ko kākou ʻāina aloha. He wahi kumuhana kaʻu e hāpai ai no kekahi hana i maʻa iā kākou a pau, ʻo ia ka noho ʻana i ka ipu lua e hoʻopau ai i ka pilikia, a pau ka hana, hoʻokuʻu aku nō i ka wai ʻino a nalo ka ʻino. I ka pule nei, ʻo au kekahi e noho ana i ka ipu lua e heluhelu ana hoʻi i ka nūhou kūloko ma luna o ke kelepona, a ʻike akula au i kahi moʻolelo e hoʻākāka ana i kahi e nalo ai ua wai ʻino lā. A he moʻolelo nō ia i noʻonoʻo ʻole ʻia e ka hapanui o kākou hoa kanaka. He moʻolelo hōlina naʻe ia e ao ai kākou o ʻinoʻino auaneʻi kēia ʻāina aloha.

Nui hewahewa nā luawai pelapela ma Hawaiʻi nei. Wahi a ka ʻOihana Mālama Olakino (ʻOMO), ma kahi o ke 88,000 ka nui, a ʻo ka hapanui hoʻi, aia nō ma nā wahi kuaʻāina, kahi nele i ka ʻōnaehana paipu lawe ʻino. A no ia mea, e nō wale aku nō ka wai ʻino i loko o ka ʻāina. A ʻoiai no ka ʻāina mai ke 90% o kā kākou wai inu, inā e mau aku nō ia nō ʻana, ʻino mai auaneʻi kā kākou wai inu. A no laila, aia ka pono i ke kanu ʻana i kahi pahu hoʻomaʻemaʻe wai ʻino. E aho ia i ka hoʻokuʻu wale ʻia o ia wai e nō aku ai i loko o ia ʻāina aloha o kākou.

Wahi a ka (ʻOMO), aia ʻehā kūlana o ia hana he mālama ʻino ma Hawaiʻi nei. ʻO ka mea mua, ʻo ia ka wehe ʻana i nā mea kino paʻa ma o ke kānana ʻia ʻana, ka hoʻokiʻo ʻia ʻana, a me ka hoʻohui ʻia ʻana o nā hunahuna ʻino a paʻa. ʻO ka lua o ke kūlana, ʻo ia ka wehe pau ʻana i nā mea ‘okanika ma o ka hoʻohana ‘ana i nā mea ola nāna ia e ʻai aku. ʻO ke kolu, ʻo ia ka wehe i nā mea ola a wehe pū me kekahi mau kemikala, ʻo ka naikokene, ka pokepola, a me nā ʻano mea ʻawahia like ʻole. ʻO ka hā, ʻo ia ka hoʻopōʻaiapuni ʻana i ka wai ʻino no ka hoʻoulu mea kanu, a i ʻole ka waiho ʻana a omoāea.

Hiki ke ʻike ʻia, ʻo ka helu ʻehā ke kūlana maikaʻi loa no ke ola o ka ʻāina a me ke kaiāulu, a i ke emi mai o ia helu, emi pū mai me ka maikaʻi o ke kaiāola. ʻO ka helu ʻekahi, ʻo ia ka lua hoʻokiʻo wai hoʻi, ʻo ia ke ʻano nui loa o ka nō ʻana o nā mea ʻino i loko o ka ʻāina me ka hoʻomaʻemaʻe ʻole ʻia. No laila, ua emi loa mai ka nui o nā lua hoʻokiʻo wai e ʻae ʻia nei e ka ʻOMO o Hawaiʻi nei, a ua pāpā loa ʻia ma nā ʻāīna e kūpilikiʻi nei. Eia naʻe, he nui nō nā lua e waiho nei mai ka wā mai i nui ai ko lākou ʻeli ‘ia. I kēia manawa naʻe, he mea nui ka hoʻololi ʻana i nā luawai pelapela a lilo mai i pahu hoʻomaʻemaʻe wai ʻino.

He wahi ʻike lihi koʻu i kēia hana, no ka mea, pēlā māua ʻo kaʻu wahine i hana ai ma ko māua hale. Ua kanu ʻia nō kekahi pahu ma ka ʻaoʻao o ka lua hoʻokiʻo wai ʻino, a no laila, e wehe pau ʻia nā mea ʻokanika mai loko mai o ka wai ʻino a ʻano maʻemaʻe maila. ʻO nā mea kino e koe ana, eia aku a eia mai e pauma ʻia nō. ʻO ka wai i hoʻomaʻemaʻe ʻia, e kahe aku nō ia i loko o ka lua wai kahi e kānana ʻia ai ma kona nō ʻana i loko o ka ʻāina. I ia manawa, ua ʻano maʻemaʻe mai ka wai, ʻaʻole naʻe au e inu!

Na ke kāleka ia e hōʻoia i ke kanaka?

na Laiana Wong (ka lā 16 o Kēkēmapa, 2017)

Synopsis: If you have to renew your state ID, be sure to take all the necessary documents – birth certificate, soial security card, and two documents verifying your resident address.

Aloha mai kākou e nā hoa heluhelu. ʻO Laiana nō paha kēia e hoʻolaha aku nei i kēia manaʻo, ʻaʻole paha. Pehea ana lā ʻoukou e ʻike ai? Ua hōʻike ʻia aʻela kona inoa ma hope o ka huaʻōlelo “na” ma luna aʻe nei, a kainō ʻo ia ʻiʻo nō ka mea nāna kēia ʻatikala i kākau. Eia naʻe, ʻaʻole ʻoukou i ʻike maka i ke kanaka nona kēia mau manaʻo, a nāna hoʻi ia e kākau nei. Na ka hilinaʻi wale nō i ka ʻoiaʻiʻo o ia inoa e alakaʻi i ka noʻonoʻo ʻana ʻo Laiana nō kā ia e kākau nei.

I kēia au a kākou e noho nei, he mea nui ka mālama ʻana i kekahi kāleka hōʻoia kanaka, i mea e hōʻoia ai i ua kanaka nei, ʻo ia nō ia. He au hou kēia. Aia nō i ka nuʻa nā kānaka. A no laila, ʻaʻole i kamaʻāina nā mea a pau o ke kaiāulu e like me ka wā ma mua. Ke hele au i Costco ma Iwilei, paʻapū mau ia wahi, a kākaʻikahi ʻiʻo hoʻi koʻu hālāwai ʻana me kekahi hoa kamaʻāina. Ua hele nō a malihini au i koʻu ʻāina hānau! A inā e manaʻo au e kūʻai i kekahi mea a uku hoʻi me kekahi pila kīkoʻo a kāleka kāki paha, ʻaʻole e nele koʻu koi ʻia e hōʻoiaʻiʻo ē ʻo au nō kā ia e uku nei. Aloha nō ia mau lā i hala akula. He kamaʻāina nō ke kamaʻāina!

Aia ma ka ʻaoʻao ʻEwa o Costco, ma ke alanui ʻo Alakawa, ke keʻena aupuni kahi e kiʻi ai i ke kāleka hōʻoia kanaka. Ma laila māua ʻo koʻu kaikaina i hele ai i kēlā pule aku nei no ka hoʻōla hou ʻana i ko ia ala kāleka, a he mau lā wale nō ia ma mua o ka palena. Aloha nō kahi keiki ʻo au. Ua ʻike ʻole i nā lula. I ko māua hele mua ʻana, ʻaʻole nā palapala a pau e pono ai. Auē! ʻO ka hoʻi nele ia i ka hale. Hoʻokahi wale nō pōmaikaʻi o ia hoʻohoka ʻana. Ua pale ʻia ko māua komo loa ʻana ma loko o ia keʻena a me ke kū ʻana hoʻi i ka laina loloa no 2 a 3 paha hola, a oki loa ka hoka.

ʻImi akula māua i nā palapala a pau i koi ʻia, ʻo ka palapala hānau, ka palapala helu ola, a me ʻelua palapala e hōʻike ana i ko ia ala helu wahi. A paʻa ia mau mea, hele hou akula māua i ke keʻena i ka P2 nei. Ma hope o ke kū ʻana ma ka laina loloa, ua hiki aku māua i ka pukaaniani, kahi e kamaʻilio ai me ka limahana. I nānā mai ka hana o ua limahana nei i nā palapala a pau, ʻōlelo maila ʻo ia he hoʻokahi wale nō palapala e hōʻike ana i ka helu wahi o ka hale a koʻu kaikaina e noho ana, a nui nā palapala e hōʻike ana i koʻu helu wahi. No laila, ʻaʻole e hōʻike ʻia ko ia ala helu wahi ma luna o ke kāleka.

Noi akula au e nānā hou ʻo ia i nā leka i hoʻouna ʻia mai iā ia ma o koʻu helu wahi. ʻO kona hoʻi akula nō ia i kahi lumi ma hope o kona pukaaniani, kahi e kamaʻilio ai me kona luna. ʻAʻole nō a he wā, hoʻi maila ʻo ia me ka hōʻike ʻana mai ua hiki ke hoʻohana ʻia ke kāleka hōʻoia kanaka kahiko i mea e hōʻoia ai i ka helu wahi o koʻu kaikaina, ʻoiai ʻaʻole i pau ka pono o ia kaleka. He akamai hoʻi kau! ʻO ke kāleka hōʻoia kanaka kahiko i hoʻohana ʻia no 6 makahiki no ka hōʻoia ʻana i koʻu kaikaina, nāna nō i hōʻoia mai i koʻu kaikaina, ʻo ia nō koʻu kaikaina!

Nalo ka wahine i loko o ka huaʻōlelo aikāne

na Laiana Wong (ka lā 9 o Kēkēmapa, 2017)

Synopsis: There is an implication attached to the word aikāne, that it only applies to males. Females are not represented based on its overt construction. Its meaning, generally understood through English translations, can carry negative connotations.

Aloha kākou e nā aikāne (hoa) ʻōlelo Hawaiʻi. I ka P3 nei, ua mālama ʻia ke kūpale papahana laeoʻo a kaʻu haumāna, ʻo Kuʻulei Alves, no ke kekelē ʻōlelo Hawaiʻi. ʻO ke kumuhana i noiʻi ʻia, ʻo ia ke kūlana o ka wahine ma ke kuanaʻike Hawaiʻi. Hoʻohālike ʻia aku nō ia me ke kūlana o ka wahine ma ke kuanaʻike haole. A i loko o kā ia ala hōʻike, hāpai ʻia maila kahi huaʻōlelo e lohe nui ʻia nei ma ka ʻōlelo Hawaiʻi, ʻo ia nō ʻo “aikāne”, a kūkākūkā ʻia hoʻi kona mau manaʻo like ʻole.

Hōʻike maila ʻo ia ala i nā manaʻo i hōʻiliʻili ʻia e Pukui mā lāua ʻo Elbert, a pēlā hoʻi me kā Andrews a me kā Parker. Ua hoihoi nō ka hoʻohālikelike ʻia ʻana o kēia mau wehewehena kekahi i kekahi, no ka mea, ʻaʻole i like a like ka ikaika kuhi o ia mau puke i ke ʻano o ka moe ʻana o nā kānaka. Ua kuhi pololei aku ʻo Andrews i ka pilina o kēia huaʻōlelo Hawaiʻi me ka huaʻōlelo “sodomy” ma ka ʻōlelo haole. Ma loko o ka puke a Pukui mā, aia wale nō ke komo ʻana o ia manaʻo a pākuʻi ʻia mai ka huaʻōlelo “aikāne” ma ke ʻano i kāhulu no “moe”, ʻo ia hoʻi, ʻo “moe aikāne”.

I hoihoi kēia, no ka mea, e like me ka hōʻike a Andrews, ua wehewehe ʻo Pukui mā ma o ka ʻōlelo haole penei, “An intimate friend of the same sex”. Eia hou, he ʻelua huaʻōlelo ma ke kūkulu ʻia ʻana o ka huaʻōlelo “aikāne”, ʻo “ai” a ʻo “kāne”, a ʻo ka manaʻo mua o ai ma lalo o ka wehewehe ʻana a Pukui mā, ʻo ia ke “coition”, he ʻano huaʻōlelo kūlana kiʻekiʻe no panipani. A ua lilo ka huaʻōlelo “kāne” ʻo ia kona kāhulu. Aia i laila ka mea hoihoi. Kohu mea lā, he hana ia na ke kāne wale nō e lawelawe ai, a na haʻi paha e lawelawe mai ai i ke kāne. ʻAʻole paha pēlā.

Pehea lā hoʻi ka wahine? Ma muli nō paha o ia hua ʻo “kāne”, e manaʻo ʻia iho ʻaʻohe komo ka wahine.  ʻAʻole i maopopo iaʻu nā hana a pau i hiki ke kapa ʻia he “ai”, a pēia hoʻi paha me nā manaʻo pili i ka huaʻōlelo ʻo “panipani”. ʻAʻole naʻe paha kēia he hana na ke kāne wale nō. He hana anei kēia na ka wahine? A he aha hoʻi ka manaʻo o “intimate”? Ua pili kēia hua i ia mau hana ʻo ke ai a me ka panipani? Noʻu iho, ʻaʻole paʻa ka haʻina iaʻu. Maliʻa o ala mai ka poʻe ʻike, a e kūkala mai lākou ma o kahi ua lā a kū ai i nā kala hale.

Wahi a Andrews, ʻo ka noho kekahi ʻano o ia mea he aikāne. ʻO ka noho pū ʻana ia he kāne a he kāne, a i ʻole ia, he wahine a he wahine. ʻO ka huaʻōlelo haole no kēia “noho pū” ʻana, ʻo ia hoʻi ʻo “cohabit”. Pehea lā? He ai nō paha ia, ʻaʻole paha? No ke aha i wehewehe lihi wale ʻia ai kēia hua i loko o nā puke wehewehe ʻōlelo? No ka makaʻu paha i ka hoʻohalahala ʻia mai? He mea ia e hilahila ai? Noʻu iho, he hana ia i hoʻokae ʻia e ka poʻe Kalikiano a ua hele a like ka manaʻo me ko ka huaʻōlelo ʻo “hoapili”. He hoapili a i ʻole he hoa ai, ʻaʻole e hihi. ʻAʻohe hewa i laila. He mau wāhine paha a he mau kāne, ʻaʻohe wehena i laila!

E mau ka pono o ka Lā Kūʻokoʻa

na Laiana Wong (ka lā 2 o Kēkēmapa, 2017)

Synopsis: Sir George Simpson of the Hudson Bay Company is one of the lesser known plenipotentiary envoys sent by Kauikeaouli to America and Europe to secure a treaty recognizing Hawaiʻi as an independent state.

Welina e nā hoa aloha ʻāina e paio nei no ke ea o ke Aupuni Mōʻī o Hawaiʻi he aupuni kūʻokoʻa. ‘O ka lā 28 o Nowemapa, i ka pule nei, ʻo ia ka piha ʻana o nā makahiki he 174 o ka lā i laha ai ke kuahaua a ka Mōʻīwahine o Pelekane a me ka Mōʻī o Palani no ko lāua ʻike ʻana a kākoʻo ʻana hoʻi i ke kūlana kūʻokoʻa o ke aupuni o Hawaiʻi nei. ʻAʻole kākou he ʻai pala maunu na haʻi!

I ka lā 24 o Nowemapa o ka MH 2002 (ʻo ka makahiki mua loa ia o ka puka ʻana o Kauakūkalahale), ua kākau maila koʻu hoa ʻōlelo Hawaiʻi ʻo Noenoe Silva, i kekahi kolamu no kēia lā nui e hoʻolauleʻa hou ʻia nei ma hope o nā makahiki he 100 a ʻoi o kona nalo ʻana. Ua kāpae ʻia e ka “Lepupalika” o Hawaiʻi, he pūʻulu ʻānunu a pākaha hoʻi ke ʻano, nāna i kāʻili hewa i ka mana o ka Mōʻīwahine Liliʻuokalani ma ka hoʻokahuli ʻana i ke aupuni o Hawaiʻi he mau makahiki ma mua iho, i ka MH 1893. Ua hōʻike ua ʻo Noenoe no ke kiʻi ʻana o Timoteo Haʻalilio lāua ʻo Uiliama Likeke e hoʻoponopono i ka hihia i kupu mai i ka MH 1843 ma muli o ka naʻi kolohe ʻana o ka ʻAkimalala Paulet i ke aupuni Mōʻī. Hiki ke heluhelu hou ‘ia kā ia ala moʻolelo ma Kauakukalahale.org. E hoʻouka wale mai nō i ka polokalamu Bloglovin ma ke kelepona paʻalima.

ʻO kekahi mea kōkua iā Haʻalilio mā, a i hōʻike ʻole ʻia kona inoa ma loko o ka moʻolelo a Noenoe, ʻo ia nō ʻo Sir George Simpson, he kiaʻāina no ʻEnelani e hana ana no ka Hudson Bay Company ma kahi o Wanekouwa. I ka MH 1842, i ko ia ala hōʻea ʻana mai i Hawaiʻi nei no kāna hana, ua ʻike ʻo ia i ka hihia i kupu maila a ua manaʻo ʻo ia, he kohu ʻole ka hana a Paulet. Ua hāʻawi mai ʻo ia ala i ke kālā he 10,000 paona me ke aʻoaʻo mai i ka Mōʻī Kamehameha III e hoʻouna aku i mau ʻelele no ka hele ʻana i ʻAmelika a me ʻEulopa e hoʻopaʻa ai i kekahi ʻaelike kuʻikahi me nā aupuni mana o ke ao. A laila, ua hoʻokohu ʻia ʻo Haʻalilio, Likeke, a me Simpson e lilo i mau ʻelele nona ka mana hoʻoholo a pūlima hoʻi ma ka ʻaoʻao o ke aupuni Mōʻī.

I ka P3 nei, ua mālama ʻia he haʻiʻōlelo na Keanu Sai ma ke Kulanui e pili ana i ka Lā Kūʻokoʻa. ʻAkahi nō au a lohe i ka inoa o Simpson. I hewa nō paha i koʻu noho naʻaupō e pili ana no ia moʻolelo? Eia au ke kuhi nei ua nalo kona inoa no kona hele ʻana ma o ʻālaka a me Lukia a hiki aku i ʻEulopa. ʻO Haʻalilio mā naʻe, ua hele ma o Mekiko, ma luna o ke kekake hoʻi, wahi a ka lohe, a ua hālāwai hou aku me Simpson ma ʻEulopa. Ma Ladana, ua hele lākou i mua o ke Kauna o Aberdeen. ʻAʻohe wahi kōkua i laila, no ka mea, ua kuhihewa ʻia he pilina kākoʻo ko Hawaiʻi me ʻAmelika.

Ma ia hope aku naʻe, ua hele lākou i Brussels, ma Belegiuma. Ma laila lākou i hālāwai ai me ka Mōʻī, ʻo Leopold I, a he pilina maikaʻi kona me nā ʻohana aliʻi o Palani a me ʻEnelani. A ma muli o ia pilina, loli ai ka manaʻo o ke kauna a ua pūlima ʻia ka ʻaelike e Pelekane a me Palani. Ma Iune o kekahi makahiki aʻe, ua hōʻike maila ʻo ʻAmelika i kona kākoʻo i ia kūlana o Hawaiʻi, he aupuni kūʻokoʻa. Mahalo ka hana nui a Sir George Simpson.

E ʻaʻala anei ka pua i kona inoa

na Laiana Wong (ka lā 25 o Nowemapa, 2017)

Synopsis: Names that have been suggested for the rail stations by a HART committee do not have meanings that reflect the history and the issues surrounding the project. They should have names that are informative.

Aloha mai kākou. ʻO kēlā poʻo manaʻo e kau mai ana ma luna nei, he nīnau ia no ka mana o ka inoa. I ka wā iā Uiliama Hoʻonāueueihe i kākau ai i kāna moʻolelo kaulana no nā ipo ʻelua, ʻo Romeo lāua me Julieta, no ke kaua hoʻomauhala ʻana o ko lāua mau ʻohana ʻelua me ka pākela māhanahana o ka inaina, e hōʻike ana ʻo ia ala no ke kūpono ʻole o ka hoʻokae aku o kekahi ʻohana i kahi ma ke ʻano he hoʻokae wale aku nō. He oki loa hoʻi ka hoʻokae aku ma muli wale nō o ka inoa. Wahi a Hoʻonāueueihe, he  mea ʻole ka inoa o ka pua, ʻo ia mau kolopua nō.

Noʻu iho, e kaukaʻi aku ka noʻonoʻo ma luna o ka hōʻike a Pukui no ia mea he inoa, ʻo ia hoʻi, he mana ko laila. Ua hōʻike maila ʻo ia no nā ʻano inoa like ʻole i kapa ‘ia ma luna o kākou kānaka, a na ka inoa nō e alakaʻi i ko kākou ʻano. ʻAʻole naʻe e pau ke kapa inoa ʻana ma laila. Ua kapa ʻia ka inoa o nā ʻāina like ʻole mai ka nui a ka liʻiliʻi, a ua hoʻohana ʻia ua mau inoa ʻāina lā i loko o nā mele a me nā ʻōlelo noʻeau no ka hoʻohanohano ʻana, ka hoʻohalahala ʻana, ka hoʻomanaʻo ʻana i kekahi hana, a ia mea aku ia mea aku. A wahi a Pukui mā, ma loko o ka puke Place Names of Hawaii, he nui hewahewa nā inoa hou o ka ʻāina e haku ʻia nei no nā wahi hou e kūkulu ʻia nei, he hale, he pāka, he alanui, he kaiāulu, a pēlā akula. A ua pau pū nō hoʻi me ke alakaulewa e holo nei ma Oʻahu, a e kaulana nei i ka pipiʻi loa o ke kumukūʻai.

Ua hāpai ʻia aʻe nei he mau inoa no nā wahi hoʻolulu ʻeiwa e kūkulu ʻia nei. Eia ihola nō ua mau inoa lā e like me ko lākou hōʻike ʻia ma ka nūhou. ʻO Kualakai, Keoneae, Honouliuli, Hoaeae, Pouhal(a), Halaulani, Waiawa, Puuloa, a ʻo Halawa. Ua kamaʻāina ua mau inoa nei, ʻoiai he mau inoa ʻāina ia no ia mau wahi, a ʻo ia ke kumu e maopopo ai ka manaʻo a me ka puana ʻana, a me ka moʻolelo paha. ʻO Keoneae naʻe, ʻaʻole au kamaʻāina.

Ua hele nō a kaulana ua alakaulewa nei i kona kūʻē ʻia no ka pūhalalū ʻana o ka moʻohelu kālā i ʻāpono ʻia no kona kūkulu ʻia ʻana. Eia hou, e kāki ʻia ana nā kānaka a pau, akā, ʻaʻole kākou a pau e ʻike ana i ka pōmaikaʻi ke hoʻomaka kona nome ʻana i ke ala hao. No laila, ʻaʻole paha e maikaʻi ke kapa inoa ʻana i ia mau kahua hoʻolulu ma nā inoa ʻāina. Maikaʻi paha ke kapa ʻana i nā inoa no ka hoʻomanaʻo ʻana i ka moʻolelo o ke kūkulu ʻana a me nā mea hoihoi paha o ia mau ʻāpana ʻāina. A no laila, eia au ke hāpai nei i kekahi mau inoa ʻē aʻe.

Eia mai: ʻo Pohākalae, no ka nui o ke kālā e lele kapuahi ana i ke kūkulu ʻia ʻana; ʻo Pīkaʻamo, no ka paʻu mau ʻana o nā limahana; ʻo Honokamanō, no kahi noho o Kaʻahupāhau; ʻo Keonehāneʻe, no ke ʻano paʻa ʻole o ka honua ma ia wahi i kūkulu ʻia ai nā pou; ʻo Keakekālā, no ka ʻānunu o ka poʻe ʻahaʻōlelo e noho ana ma ka ʻaoʻao ʻEwa a e piʻi ana ka waiwai o ko lākou hale; ʻo Alakokopi‘i, no ka hopena o ka ʻai nui ʻana i ke kōpaʻa; ʻo Kalaʻihikalā, ʻoiai he ʻāina wela ʻiʻo nō ia Kona; ʻo Kanuʻaonākānaka, no ka noho paʻapū ʻana o ka poʻe o ia wahi; a ʻo Kaiʻahāmauleo, no ka pipi i ʻane halapohe ma ia kai haumia.

Ua ʻokoʻa ka manaʻo o Hoʻonāueueihe a ʻokoʻa hoʻi ko ka Hawaiʻi. He mana ko ka ʻōlelo, a he mana pū ko ka inoa ʻāina.