01-16-19

He koho pāloka hou paha ke mālama ʻia.

ʻO ia aʻela kekahi poʻo nūhou o kēia lā, ka lā 16 o ka mahina ʻo Ianuali, he Pōʻakolu. Welina e nā makamaka. ʻO Ke Aolama kēia a penei ka nūhou.

E koho pāloka hou ʻia paha ka luna ʻaha kūkā o ka ʻāpana Honolulu Hikina. ʻO Trevor Ozawa ka luna ʻaha kūkā o ia ʻāpana ma mua, a ʻo ia nō hoʻi ka mea i koho ʻia ma ka lā koho o ka makahiki 2018. Akā, ua nele ʻo Honolulu Hikina i ka luna ʻaha kūkā mai ka lā ʻelua o Ianuali ma muli o ka waiho ʻana aku o Tommy Waters i kūʻē i ka hopena o ia koho pāloka ʻana a pēlā pū nō me kekahi mau manakoho he 39 o Honolulu Hikina. Aia nō ia hihia i mua o ka ʻAha Hoʻokolokolo Kiʻekiʻe o Hawaiʻi nei. ʻO ka pilikia, ua lawe ʻia akula he 350 mau pāloka hoʻouna leka i ke keʻena o ke kākau ʻolelo o ke kūlanakauhale ʻo Honolulu ma hope o ka hola 6:00 o ke ahiahi, ka hola kaupalena hoʻi. ʻO kekahi pilikia, ʻoiai, ua hoʻohui ʻia ia mau pāloka me kekahi mau pāloka, ʻaʻole hiki ke hoʻokaʻawale hou ʻia. ʻAʻole i maopopo ka lā e kau ai ka ʻōlelo hoʻoholo o ka ʻAha Kiʻekiʻe.

Hopu ʻia aku nei kekahi kanaka o Hanamāʻulu i ʻōlelo ʻia, ua hōʻeha aku ʻo ia i kekahi wahine ma Hanalei. E hoʻoholo ana ua wahine nei i kāna ʻīlio, ʻaʻole naʻe i paʻa ma ke kaula. A i ia manawa, holo akula ka ʻīlio a hoʻomake akula i kekahi nēnē keiki. A i ka wā i ʻike ai ke kanaka o Hanamāʻulu, holo akula ʻo ia a peku aʻela i ka ʻīlio i mea e pau ai ka hana a ka ʻīlio. A i ka wā a ia kanaka e hoʻāʻo ana pēlā, peku akula paha ʻo ia i ka wahine. Aia nō ke kolokolo ʻia nei ka hoʻomake ʻia ʻana o ka nēnē keiki. A e hoʻopaʻi ʻia auaneʻi paha ka wahine ke pau ke kolokolo ʻana. ʻO ka nēnē, he manu ʻane nalowale loa nō ia, a no laila, ua hoʻomalu ʻia ma nā kānāwai mokuʻāina a pekelala hoʻi.

Eia mai kā kākou ʻōlelo noʻeau,

ʻO Muku ka lā, mumuku ka hana.

He ʻōlelo aʻo kēia, ʻaʻole e hoʻomaka kahi papahana ma ka pō i o Muku o kō ʻole ia papahana.

01-14-19

He hale papaʻi no ka poʻe hana noʻeau, aia ma Kakaʻako.

ʻO ia aʻela kekahi poʻo nūhou o kēia lā, ka lā 14 o Ianuali, he Pōʻakahi. Welina e nā makamaka. ʻO Ke Aolama kēia a penei ka nūhou.

Ma Kakaʻako, ʻaneʻane e pau i ke kūkulu ʻia he hale papaʻi no ka poʻe i haʻahaʻa ka loaʻa makahiki. ʻO ka poʻe noho ma laila, ʻaʻole e ʻoi aku ka loaʻa makahiki i ke 60 pākeneka o ka loaʻa makahiki kūwaena. A ua hoʻokaʻawale ʻia kekahi mau keʻena noho no ka poʻe nona ka hapalua like o ka loaʻa makahiki kūwaena a emi mai paha. Inā he hoʻokahi wale nō kanaka, he $24,510 ka loaʻa makahiki a emi mai. A ʻo ka mea ʻāpiki, ma nei hale papaʻi, e lilo mua nā keʻena noho i ka poʻe hana noʻeau. ʻO ke keʻena noho, mai ka 680 kapuaʻi kuea a i ka 1,279. A ʻo ka uku hoʻolimalima, mai ka $522 a i ka $1,670. He 84 keʻena noho o ia hale papaʻi, a aia ma 1025 Alanui Waimanu. Aia nā palapala noi ma eahhousing.org/future/artspace-lofts. A ʻo ka lā 22 o ka mahina ʻo Ianuali 2019, ʻo ia ka lā kaupalena e waiho ai i ke noi.

ʻO ka lā kēia e hoʻomaka ai ka hoʻokō ʻia ʻana o ka lula hou a ka Pelekikena Donald Trump e ʻae ana i ka haku hana e hōʻole i ka hoʻolako wale ʻana i ka wahine i ka mea kaupalena hānau. Akā, ua holo ihola ka manaʻo o kekahi lunakānāwai o Kaleponi, ka Mea Hanohano Haywood Gilliam, e ʻākeʻakeʻa aku i ka hoʻokō ʻia ʻana o ia lula ma kekahi mau mokuʻāina he 13 a me Wakinekona, D.C. ʻO Hawaiʻi kekahi o ia mau mokuʻāina. A eia mai nā mokuʻāina ʻē aku, ʻo Kaleponi, ʻo Konekikuka, ʻo Kelawea, ʻIlinoe, ʻo Melelana, ʻo Minekoka, ʻo Nū Ioka, ʻo Kalolaina ʻĀkau, ʻo Loke ʻAilana, ʻo Welemoneka, ʻo Wilikinia, ʻo Wakinekona a me ka ʻĀpana ʻo Kolumepia. Ua noi ʻia ka lunakānāwai i ka ʻākeʻakeʻa ma ʻAmelika Hui Pū ʻIa a puni. Hōʻole maila naʻe ʻo Gilliam. A no laila, no nā mea hoʻopiʻi wale nō kāna ʻōlelo hoʻoholo.

Eia mai kā kākou ʻōlelo noʻeau,

Pili pū i ka paia.

ʻO ia hoʻi, ua kū loa i ka pilikia.

 

 

 

 

12-12-18

Lilo aku nei kahi puʻu kālā i kekahi kumu kula o Hawaiʻi no ka mālama ʻana i ʻOlimepika hoʻokani.

ʻO ia aʻela kekahi poʻo nūhou o kēia lā, ka lā 12 o Kēkēmapa, he Pōʻakolu. Welina e nā makamaka. ʻO Ke Aolama kēia a penei ka nūhou.

I ke kakahiaka o nehinei, ua kī ʻia aku nei kekahi wahine i ka pū e ka mākaʻi a make ihola ma ka mokupuni ʻo Hawaiʻi. ʻO Tori M. Kaneshiro ka inoa o ua wahine lā. Ua kū kona kaʻa ma ke Alanui ʻo Kahakai o Hawaiian Beaches ma Pāhoa a e ʻiʻimo ana ke kukui pōʻino a manaʻo ihola nā mākaʻi e nānā i ka maikaʻi a me ka maikaʻi ʻole paha o ka mea kalaiwa. I ke kamaʻilio ʻana aku o ka mākaʻi iā Kaneshiro, hoʻomaopopo ihola ʻo ia, he palapala hopu i hoʻolaha ʻia no Kaneshiro. A haʻi akula ka mākaʻi, e hopu ʻia ana ʻo ia ma muli o ka palapala hopu. Wahi a ka mākaʻi, hōʻole ihola ʻo ia i ka lele ʻana i lalo o ke kaʻa. I ia manawa, lele aʻela ʻo ia i ka noho o hope a ua ʻōlelo ʻia, lālau ihola ʻo Kaneshiro i ka pū laipela, kauoha akula nā mākaʻi e kau ka pū i lalo, ʻaʻole naʻe ʻo ia i hana pēlā. Wahi a ka Mēkia Sam Thomas, ua kau ka pū laipela a ka wahine i nā mākaʻi ʻelua a i ia manawa i kī aku ai kekahi iā Kaneshiro. Hoʻāʻo ihola nā mākaʻi e hoʻōla hou iā ia akā, i ka hiki ʻana aku i ka Haukapila o Hilo, ua lele ʻē ka hanu. ʻO ka lua kēia o ka manawa i kī ʻia ai kekahi kanaka i ka pū e ka mākaʻi a make i loko o nā pule ʻelua.

Lilo aku nei he $100,000 i kekahi mau kumu aʻo ʻelima o ʻAmelika Hui Pū ʻIa ma ka Hoʻokūkū Moemoeā Nui. Na ka hui ʻo ʻInikua Mahiʻai ka hoʻokūkū. A ʻo Zachary Morita o ke Kula Waena o ke Awāwa ʻo Niu kekahi o ia mau kumu i lanakila. ʻO ka pahuhopu o ka hoʻokūkū, ʻo ia ka hōʻike ʻana a ke kumu i kahi moemoeā ma ke aʻo ʻana i nā keiki. ʻO ka manaʻo o Morita, ʻo ia ka mālama ʻana i ʻOlimepika hoʻokani no nā haumāna o kēia pae ʻāina nei. A ʻoiai, ua nele kekahi mau kula i nā pila, nā pū a me nā mea hoʻokani like ʻole, e kūʻai ʻia ana ia mau mea no ia mau kula.

Eia mai kā kākou ʻōlelo noʻeau,

Pulelo ke ahi haʻaheo i nā pali.

He ʻōlelo kēia no ka lanakila ʻana.

12-10-18

ʻAʻohe mea nāna e paʻi ke poʻo o Max Holloway.

ʻO ia aʻela kekahi poʻo nūhou o kēia lā, ka lā 10 o Kēkēmapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Ua hoʻāhewa ʻia aku nei ʻo Nicholas Slot no ka pōā, ka limanui a me kekahi mau hana ʻē aku, ma hope o ka hōʻike ʻana o kekahi keiki i mua o ka ʻaha hoʻokolokolo i i ka lālau ʻino ʻana o kekahi kanaka i kāna iPada a me ka ʻumi ʻana mai iā ia. I ka manawa e ʻumi ʻia ana ke keiki, holo kekahi keiki i loko o ka lumi me ka ʻuā ʻana aku i ke kumu, aia lā kahi keiki e ʻumi ʻia ana i waho. Hahai akula ke kumu i ke kanaka a hoʻihoʻi maila ua kanaka nei i ka iPada i ke kumu me ka ʻōlelo pū ʻana, hana ʻo ia no ke Keʻena Mākaʻi o Maui. A ma hope mai, hopu ʻia ihola ʻo Slot e ka mākaʻi. ʻO ke kiʻekiʻe loa o kona hoʻopaʻi, he 10 makahiki e noho paʻahao ai no ka pōā. E kau ka hoʻopaʻi i ka mahina ʻo Malaki.

I ka pō Pōʻaono nei ke kūpale ʻana o Max Holloway i kona inoa moho 145 paona ma ka mokomoko ʻana me Brian Ortega. ʻAʻole i hiki aku i ka puni ʻelima a lilo ai ke eo iā Holloway. I kāpae ʻia aku ka puni ʻelima ma muli o ka ʻōlelo a ke kauka. Ua pehu loa ihola ka maka hema o Ortega.

A ma ka pōpō peku, ʻaʻole i lilo ka Makana Heisman iā Tua Tagovailoa. Iā Kyler Murray o ʻOkalahoma i lilo ai ua makana nei. Akā, he 1,871 ʻai a Tagovailoa, a ma ka moʻolelo o ka Makana Heisman, he 84 mau makahiki, ʻo ia ka nui loa o nā ʻai a ka moho kūlana helu ʻelua. He 2,167 ʻai a Murray.

Eia mai kā kākou ʻōlelo noʻeau,

Waiho akāka ke kula o Kaiolohia.

He ʻōlelo kēia no kekahi mea ahuwale.

 

12-07-18

Ua pani ʻia ka Haukapila Kaiāulu o Kona.

ʻO ia aʻela kekahi poʻo nūhou o kēia lā, ka lā 7 o Kēkēmapa, he Pōʻalima. Welina e nā makamaka. ʻO Ke Aolama kēia a penei ka nūhou.

Ua pani ʻia ihola ka Haukapila Kaiāulu o Kona i ka Pōʻahā nei ma muli o ka laha loa ʻana o ke kunakuna a i mea hoʻi e loaʻa ʻole ai nā maʻi a me nā limahana o ka haupila i ke kunakuna. He laha wale ke kunakuna ma ka pā ʻana o ka ʻili o ke kanaka i loaʻa i ke kunakuna i ka ʻili o kekahi. I ka lā 19 o Nowemapa i hōʻoia ʻia ai ka laha o ke kunakuna ma ia haukapila. ʻO ke kunakuna, he ona ia nāna e poholalo a i lalo o ka ʻili, a hānau aku i ka hua. A he mau mahina e noho ai ma laila, inā ʻaʻole e lapaʻau ʻia. ʻAʻole i pani ʻia nā wahi a pau o ka haukapila. ʻO ka poʻe i ʻae ʻia ka noho ʻana ma ka haukapila, ʻo ia nā mākuahine hānau a me nā keiki e kaha ʻia ana. A ʻo ia mau nō ka lawelawe ʻia ʻana o nā hana e hoʻokō koke ʻia ʻoi kau ka lā.

Kau aʻe nei ʻo Tua Tagovailoa i ka hano hāweo. Lilo aku nei he ʻelua makana iā ia no ka maikaʻi wale o kāna hana ma ka pōpō peku i ke kikina nei i hala. ʻO ka makana mua i lilo iā ia, ʻo ia ka Makana Mea Pāʻani o ka Makahiki ʻo Walter Camp. A ʻo ka lua o ka makana, ʻo ia ka Makana ʻo Maxwell. A i ka lā ʻapōpō e ʻike ʻia ai ka mea pāʻani nāna ka Makana Heisman. ʻO Tagovailoa kekahi o nā moho.

Eia mai kā kākou ʻōlelo noʻeau,

Mōhala maikaʻi ke oho o ke kupukupu.

He ʻōlelo kēia no ke kanaka nohea.

12-05-18

Kūpaʻa ma hope o Mauna Kea.

ʻO ia aʻela kekahi poʻo nūhou o kēia lā, ka lā 5 o Kēkēmapa, he Pōʻakolu. Welina e nā makamaka. ʻO Ke Aolama kēia a penei ka nūhou.

I kēia lā, ka lā ʻelima hoʻi o Kēkēmapa, i ke kau ʻana o ka lā i ka lolo, e ʻākoakoa ana nā kumu, nā limahana a me nā haumāna o nā kahua Oʻahu o ke Kulanui o Hawaiʻi no ka hōʻike ʻana aʻe i ko lākou kūpaʻa ma hope o Mauna Kea. Aia ana ia kū ʻana i ka pono i mua o Hawaiʻi Hale ma ke Kulanui o Hawaiʻi ma Mānoa. A e koi ana lākou iā Pelekikena David Lassner a me ka Papa o nā Kahu Kula o ke Kulanui o Hawaiʻi a me ka hui ʻo TMT, e hoʻopau i nā ʻaelike e pili ana no ke kūkulu ʻana i ka ʻOhe Nānā Kanakolu Mika a pau loa ma luna o Mauna a Wākea. A ʻo kekahi mea e koi ʻia, ʻo ia ke kāpae ʻia ʻana o nā Lula Lawelawe Hana Mauna Kea, ʻoiai, he mea ia e hoʻohāiki ana i ka hana a me ka loina a ke Kanaka ʻŌiwi e hana ʻia ma laila. A he mau lula hoʻi ia e lilo ai ka poʻe e hoʻomalu a e mālama ana i ka mauna i mea ʻaʻe kānāwai.

I ka Pōʻakahi nei, hōʻike ʻia aʻela nā moho ʻoi ʻekolu e alualu ana i ka Makana Heisman. A ʻo ia no ʻo Kyler Murray o ʻOkalahoma, ʻo Dwayne Haskins o ʻOhaio Mokuʻāina a me Tua Tagovailoa o ʻAlapama. He mau ʻalihi kūlele lākou ʻekolu. ʻO Tagovailoa, ʻo ia ke kolu o ka moho i puka mai ke kula kiʻekiʻe o Hawaiʻi nei. ʻO Manti Teʻo o Punahou a me Notre Dame ka mua i ka makahiki 2012, a ʻo Marcus Mariota o Kāna Lui a me ʻOlekona i ka makahiki 2014. Ua lilo ka Makana Heisman iā Mariota i ia makahiki.

Eia mai kā kākou ʻōlelo noʻeau,

E hume i ka malo, e hoʻokala i ka ihe.

He ʻōlelo kēia no ka hoʻomākaukau ʻana no ke kaua a no kekahi hana paha.

12-03-18

Ua piʻi aʻela ka helu o nā haumāna Hawaiʻi i puka mai ke Kulanui o Hawaiʻi i loko o nā makahiki ʻehā.

ʻO ia aʻela kekahi poʻo nūhou o kēia lā, ka lā 3 o Kēkēmapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Ua māhuahua aʻela nā haumāna Hawaiʻi i puka mai ke Kulanui o Hawaiʻi i loko o nā makahiki he ʻehā wale nō. I ka makahiki 2010, he 10 wale nō pākeneka o nā haumāna Hawaiʻi, ua paʻa ke kekelē lae pua ma loko o nā makahiki he ʻehā. A i kēia makahiki nei, ua pākolu i ia helu, he 32.3 pākeneka. ʻO nā haumāna Pilipino kekahi i ʻeleu aʻela ma ka puka ʻana ma loko o nā makahiki ʻehā. I ka makahiki 2010, he 17.5 wale nō pākeneka. A i kēia makahiki nei, he 38 pākeneka a emi iki mai.

Paʻa ihola ka hoa paio o nā Koa Ānuenue ma ka Ipu Hawaiʻi e mālama ʻia ana i ka lā 22 o Kēkēmapa. ʻO Luisiana Tech nō ia. I ka makahiki 2011 ko lāua hui hope ʻana ma ke kahua pāʻani, ka wā hoʻi o lāua ʻelua ma ka ʻAhahui ʻĀlapa Komohana. I kēia manawa, aia nā ʻĪlio Pulu o Luisiana ma ka ʻAhahui USA, a ʻo Hawaiʻi, ma ka ʻAhahui Mauna Komohana. Aia ana ka hoʻokūkū ma ke Kahua Pāʻani ʻo Aloha. A e ulele ana i ka hola 5:30 o ka ʻauinalā.

A ʻakahi nō a loaʻa ka mea kākoʻo inoa hou o ka Ipu Hawaiʻi, a ʻo kona inoa hou, ʻo ia ka Ipu Hawaiʻi SoFi. ʻO SoFi, ʻo ia nō ka Hui ʻo Social Finance. Aia ke kikowaena o ia hui ma Kapalakiko. ʻO ka lōʻihi o ka ʻaelike, he ʻelua makahiki. ʻO ka mea kākoʻo inoa hope, ʻo ia nā Hōkele ʻo Sheraton. I ka makahiki 2013 ia. A ma nā makahiki ʻehā i kaʻa hope aku nei, ʻaʻohe mea kākoʻo inoa o ka Ipu Hawaiʻi.

Eia mai kā kākou ʻōlelo noʻeau,

Pāpahi i ka hae o ka lanakila.

He ʻōlelo mahalo kēia i ka mea lanakila.

Kīhēhē wale aku ka poʻe Hawaiʻi i ke au iā Maleka

na Kekailoa Perry a me Laiana Wong (ka lā 27 o Ianuali, 2018)

Synopsis: A court case on Maui has brought attention to Hawaiian rights with respect to the domains of language use. Kaleikoa Kaeo has chosen to present his case through the medium of Hawaiian, but the judge has denied his right to do so. As his rights are stripped away, he becomes increasingly invisible; and so do we.

Aloha e ka poʻe aloha o ka ʻāina, ka poʻe hoʻi e kīhēhē wale aku nei i ke au iā Maleka.

I ka Pōʻakolu nei, ua ʻike ʻia ka hana ʻepa a ka ʻoihana kānāwai. He ʻoihana ia e kū kalaʻihi nei ma luna o nēia ʻāina aloha o kākou, ka mea hoʻi i kāʻilikū ʻia e ka lima ʻapakau ʻānunu o kahi Maleka. A e like me ke kāʻili ʻia o ka ʻāina, hopu ʻia maila kekahi keiki aloha o ka ʻāina e kahi ʻākena o ua Maleka nei, ʻo ia hoʻi, ka Mokuʻāina ʻo Hawaiʻi. ʻO kona hōʻāhewa ʻia nō ia e kēlā aupuni hoʻopunipuni no kauwahi hala mikamina a koikoi ʻia ʻo ia e hele aku i mua o kahi luna kānāwai o Maui. A i kona kū ʻana i loko o ka hale hoʻokolokolo, kāhāhā, ua kīhēhē wale aku a nalo hoʻi i mua pono o ke alo! Kohu mea lā, he pule hoʻokalakupua na ke kānāwai o Maleka kona mea i nalo ai.

ʻO ka ʻoiaʻiʻo, ua nalo ua keiki nei ma muli o kona koho ʻana e koikoi i kona pono ma o ka hoʻopuka ʻana i kona manaʻo ma o ka ʻōlelo Hawaiʻi, he ʻōlelo kūhelu no Hawaiʻi nei, a he pono hoʻi i hoʻomalu ʻia ma lalo o ke Kumukānāwai o ka Mokuʻāina ʻo Hawaiʻi, ma ka ʻatikala XV, māhele 4. Eia naʻe, i mua nō ka ʻulu a hala! Ua noke aku ua luna kānāwai nei e hoʻomakapō, a e hoʻokuli hoʻi, me he mea lā, ʻaʻole hiki iā ia ke ʻike maka i ua keiki nei o ka ʻāina, a ʻaʻole hiki ke lohe pepeiao i kāna mau ʻōlelo naʻauao.

I ka hopena, ua hōʻole ʻia ka pono o ua keiki nei, a hōʻole pū ʻia hoʻi me nā pono o kākou a pau. Auē! ʻO ua keiki nei naʻe, ua kūpaʻa ʻiʻo nō ma hope o kona manaʻo he pono, a ʻo ka pūhili loa o kahi luna kānāwai, ʻo kona hoʻopuka akula nō ia i kekahi palapala e koikoi ana i nā mākaʻi e hopu i ke keiki. He aha lā ke ʻano o kahi luna? I loko nō o ke kū ʻana o ua keiki nei i mua pono ona, ʻōlelo pololei akula nō ʻo ia iā ia me ka hea ʻana aku i kona inoa, penei, “I’m going to give you another opportunity Mr. Kaeo to identify yourself.”  ʻO ia nō ka wā i pane aku ai ʻo ia ma ka ʻōlelo Hawaiʻi me ka hōʻike ʻana aku ē ʻo ia nō ʻo Samuel Kaleikoa Kaeo. Na wai e ʻole ka ʻike i ka inoa o kekekahi kanaka ua kapa pololei ʻia aku ma o kona inoa ponoʻī? Kupanaha!

Eia hoʻi ka mea ʻino loa. Ua hoʻoweliweli mai kahi luna kānāwai iā Kaleikoa penei, “Until you speak English Mr. Kaeo, you will be considered not here.” Ua kīhēhē ʻo Kaleikoa no kona noke ʻana i ka hoʻopuka aku i kona manaʻo ma o ka ʻōlelo makuahine o nēia paeʻāina. A ma o ua ʻōlelo lā ʻo ke kīhēhē akula nō ia o kona pono, a me ka pono hoʻi o kākou a pau.

Ua puni wale kākou i ke kaena ʻana a Maleka ē he kaulike kona ʻano, a ʻaʻohe ona wahi kamawae. Ua like a like ka pono o nā kānaka a pau. Mai nō a puni! Hoʻokahi wale nō ʻōlelo lohe a kēlā luna kānāwai o Maui. No laila, e huki like kākou a hoʻopuka aku i ko kākou ʻōlelo makuahine ma nā wahi a pau!

Kani ke oeoe, he piʻoloke ko ka ʻāina

na Laiana Wong (ka lā 20 o Ianuali, 2018)

 

Synopsis: The nuclear missile alarm caused serious consternation, but people remained courteous on the roads. As for the assignment of blame, we should look no further than the two despotic leaders that are peddling fear. Lock ‘em up and let ‘em fight each other.

Aloha e nā hoa ʻalo like o ka ʻīnea, nā hoa nō hoʻi i hoʻomanawanui like i kēlā piʻoloke launa ʻole o ke kupu ʻana maila i kēlā Pōʻaono aku nei. A i kēia manawa a ma kēia hope aku nō hoʻi, ʻaʻole paha e poina ka lono kuhihewa i kukuʻi maila no ka lele mai o kahi kao lele pahū a Kōlea ʻākau i hoʻōlapa mai ai. Aia nō ma hope mai o ka hola ʻewalu, kakahiaka, ua kani ke oeoe e hahaʻi mai ana i ia lono e kū ai ka weli o ka lehulehu. A eia au, kahi kanaka oʻo, i loko o ka wā nāwaliwali loa o ka hoʻomaopopo ʻana, ʻaʻole naʻe paha e poina ia mea i nā lā e koe ana!

ʻEā, e nā hoa heluhelu, eia mai kahi nīnau maʻa mau, ma hea ʻoukou i ka wā i kani mai ai ua kūkala hewa nei? ʻO au hoʻi, e kalaiwa ana mai Kāneʻohe aku a i ke kūlanakauhale no ka hele ʻana i kekahi hālāwai. Kani maila ka leo hohō o kahi kekake ma loko mai o kaʻu kelepona, a he kani hoʻonāukiuki ʻiʻo nō e hiki ʻole ai ke huli kua ʻia. Komo ʻiʻo nō ka nīele i loko oʻu. Ua nui koʻu ʻiʻini e heluhelu i ka nūhou i hoʻouna ʻia maila, akā, makaʻu au o loaʻa mai i ka mākaʻi. No laila, e holo naʻaupō ana a hiki aku au ma ke alaloa. I ia manawa, kāhea maila kaʻu wahine no ka hahaʻi mai i ka lono.

I lohe aku ka hana oʻu, kaha akula, piʻi ma ke alanui Pali no ka hoʻi ʻana i Kāneʻohe, kahi e noho pū ai me ka ʻohana. I koʻu wahi hoʻomanaʻo ʻana, aia ma kahi o ka 8 a 10 wale nō minuke noʻu e ʻimi ai i kahi malu. ʻO ka ʻoiaʻiʻo naʻe, ʻaʻohe wahi ala e pakele ai, a no laila, ʻo ia kalaiwa mālie aku nō ma ke ʻano mau a hōʻea i ka hale. Kohu mea lā, pēlā ka manaʻo o nā kānaka ʻē aʻe, a no ka mea, ʻaʻohe kaʻa e holo pupule ana i ke alanui. ʻAʻohe wahi ʻano o ka piʻoloke a ʻike ʻia ma ia wā weliweli, koe wale nō kekahi mau kaʻa e kū ana ma haʻi o ke alanui, a e kamaʻilio ana ke kalaiwa ma ke kelepona. A i ke kokoke ʻana aku i ka hale, ua kāhea hou mai kaʻu wahine me ka nūhou maikaʻi e maha ai ka naʻau. He pūlapu wale nō ka hana!

I ka hoʻokolokolo ʻana i ke kumu o ia kūkala hewa ʻana, ua kuhikuhi ʻia kahi limahana akahana ʻole. ʻO ka huhū o ka lehulehu no ko lākou hoʻohemahema ʻia, hoʻohalahala ʻia akula ua limahana nei a hoʻohalahala pū ʻia ke aupuni mokuʻāina i ka hāwāwā o kona ʻōnaehana kūkala pōʻino. Aloha nō ua kanaka nei. Ua hoʻopau ʻia kona kuleana ma ia keʻena a hoʻoneʻe ʻia i kahi ʻē. ʻEā, ʻo kona luna paha ke hoʻopaʻi ʻia no ka hemahema o ko lākou ʻōnaehana!

ʻO ka ʻoiaʻiʻo, i hewa nō iā Huli lāua ʻo Kim Jong Un. E ʻole kā lāua mau ʻōlelo hūpō a hoʻoweliweli hoʻi i kahi a me kahi, weliweli ko kākou nohona i kēia mau lā. E aho paha ka hoʻopaʻa ʻana i ia mau aliʻi hehena i loko o kahi pahu liʻiliʻi kahi e ʻāʻumeʻume ai. Hiki nō iā kākou ke hoʻopoina iā lāua a kāpae hoʻi i ka haʻalulu a me ka pīhoihoi, a noho mau aku nō i loko o ka maluhia!

ʻInoʻino ke kai ua ʻau ʻia e ke kae

na Laiana Wong (ka lā 13 o Ianuali, 2018)

Synopsis: Unusually high levels of enterococci bacteria have been reported in the waters off at Ala Moana beach. In fact, there is about eight times the allowable amount. It is not known what has caused the spike in bacteria, but people are being notified not to swim there.

Aloha mai kākou e nā hoa heluhelu. Ua hele nō paha a he mea hoʻopākūā koʻu kākau mau ʻana no ia mea he kūkae (i ʻike ʻia i loko o ke poʻo manaʻo ma luna aʻe nei), a eia nō ke hoʻohuoi nei nō paha kekahi o ʻoukou he pulakaumaka kēia kumuhana noʻu. ʻEā, e hōʻole a e aha? Ua pololei paha. I ka lā 23 o Kēkēmapa i kēlā MH aʻe nei, ua kākau au i kekahi moʻolelo no ka pilikia o nā luawai pelapela a me ke akamai o ka hoʻokomo ʻana i kekahi pahu hoʻomaʻemaʻe wai ʻino. He mea mālama ʻāina ia, a he mālama kai nō hoʻi kekahi.

ʻAʻole lawa koʻu ʻau ʻana i ke kai i kēia mau lā. ʻAʻole hoʻi e like me koʻu wā uʻi. I ia wā, he hele mau nō i ka ʻau kai a me ke kaha nalu paha. A i koʻu hoʻomaopopo ʻana, ua aʻiaʻi a ua maʻemaʻe hoʻi nā kapakai a pau. A lawa ka au ʻana, a i ka piʻi hou ʻana mai i kahaone, ua ʻoluʻolu nā mea a pau. I kēia mau lā naʻe, ma kauwahi kahakai, ua hele a lēʻī hoʻi, aia i ka nuʻa nā kānaka. He poʻe malihini a he poʻe kūloko hoʻi kekahi. ʻO ka nui o ia poʻe, ua hapa mai ke aʻiaʻi a me ka maʻemaʻe. A i kēia mau lā, he poʻe ʻepekema nāna e makaʻala i ke kūlana maʻemaʻe a maʻemaʻe ʻole paha o ka wai, i kēlā me kēia lā, ma o ke ana ʻana i ka nui o ia mea he enterococci. He koʻohune ia a he mea hoʻi e maʻi ai kākou kānaka.

He helu ʻia ka nui o nā enterococci i loko o 100 mililika wai, a inā he 130 anakahi a ma lalo mai paha ka heluna, ua lawa ka maʻemaʻe e ʻauʻau ai. Ke piʻi mai naʻe kēlā helu he mau manawa i loko o ka mahina hoʻokahi, e pāpā ʻia ke komo ʻana i ke kai ma ia wahi, a hiki i ka maʻemaʻe hou ʻana mai. ʻO ka ʻoiaʻiʻo, he hōʻailona ke kāpili ʻia mai ma ia wahi kokoke aku nō nāna e haʻi mai ana i ka lono. He nānā ʻia paha he hulikua ʻia paha, aia nō i ke kanaka. Wahi a ka poʻe o ka ʻOihana Mālama Olakino, ʻaʻole hiki ke hōʻoia ʻia ke ʻano ʻino o nā enterococci, akā, he mea koʻikoʻi ka hoʻāʻo ʻana ma kekahi keʻena hoʻokolohua ma mua o ka wehe ʻana mai i ka hōʻailona.

I ka pule nei i hala, ua piʻi loa ka helu o nā enterococci ma kahakai o Ala Moana i ka 1013 anakahi i loko o 100 mililika wai. He ʻaneʻane pāwalu ka nui a he mea ia e hoʻopaʻa ʻia ai ua kahakai nei. ʻAʻole maopopo i ka poʻe o ka ʻOMO ke kumu i piʻi loa mai ai kēlā helu. Eia nō lākou ke ʻimi nei. I kēia wā naʻe e kuʻihē nei ko kākou noʻonoʻo, he akamai paha ke kaʻakepa ʻana. E kaha aku nō, hele i kahi ʻē.

Eia nō ka mea ʻāpiki. Aia nō i loko o kēlā inoa ʻepekema, enterococci, ke peʻe nei kahi ʻike e piʻi ai ka manene. ʻO ia hoʻi, ʻo kekahi manaʻo o ia mea, he kūkae no ke kanaka a no kekahi māmela paha. He hoʻopailua ke noʻonoʻo aʻe, a he mea hoʻi e koikoi mai ana iaʻu e hōʻalo i ia wahi. No laila, eia au ke kākau hou nei no kēia kumuhana i mea e hoʻomaopopo ai iā kākou, he aliʻi ka ʻāina a he kauā ke kanaka. Inā ʻaʻole kākou e mālama i ka ʻāina, ʻaʻole nō ia e mālama mai iā kākou.